„За понатамошни толкувања ќе почекаме резултати од судско-медицинските испитувања и иследувања од страна на Министерството за внатрешни работи“, соопштија денеска од Клиниката за неврохирургија во Скопје
Двегодишното дете што беше повредено за време на новогодишната ноќ, а потоа хоспитализирано на Клиничкиот центар „Мајка Тереза“ во Скопје, утринава починало како резултат на тешки повреди на мозокот настанати од метално страно тело. Ова од Клиниката за неврохирургија во Скопје го изјавија денеска за МИА посочувајќи дека за понатамошни толкувања ќе се чекаат резултатите од обдукцијата.
„За понатамошни толкувања ќе почекаме резултати од судско-медицинските испитувања и иследувања од страна на Министерството за внатрешни работи“,
соопштија од Клиниката.
Информацијата за смртта на детето денеска ја потврдија и од Обвинителството, од каде што посочија дека веќе е издадена наредба за обдукција на телото.
„Во однос на починатото двегодишно дете, Основното јавно обвинителство (ОЈО) Скопје издаде наредба за обдукција на телото“,
се вели во соопштението од Обвинителството.
Лекарите вчера, соопштувајќи го бројот на повредени за време на новогодишната ноќ, како тежок случај го оценија тој со двегодишното дете, кое беше примено на интензивна нега со прострелна повреда на главата од огнено оружје.
Коментирајќи го случајот, министерот за внатрешни работи Панче Тошковски вчера рече дека настанот е под истрага и оти има повеќе теории како се случил инцидентот.
Посочи дека детето е тешко повредено и се наоѓа во животно загрозувачка состојба.
„Станува збор за метален фрагмент, но во овој момент не можеме со сигурност да кажеме како точно дошло до повредата. Постојат повеќе теории за настанот и штом бидат утврдени причините јавноста ќе биде информирана“,
рече тој.
Од полицијата засега не соопштија детали каде се случил настанот, како и за околностите под кои настанал.