Како најтемен момент на 2025 година, Сиљановска-Давкова ја издвои трагедијата во Кочани. Таа упати порака дека државата има обврска да обезбеди правда за жртвите и за нивните најблиски
Претседателката Гордана Сиљановска-Давкова, во својата честитка по повод Новата 2026 година, упати желби за траен светски мир и интеграција на земјата во Европската Унија. Таа ја оцени изминатата 2025 година како период на длабоки глобални промени, но и почеток на клучни домашни реформи.
Претседателката се осврна на тешката меѓународна ситуација во годината што изминува, споменувајќи ги драматичните војни, суспендирањето на меѓународното право и енергетските кризи.
„Сакам ние да се вдомиме во Европската Унија, решени да живееме во амбиент на владеење на правото, демократија, економски просперитет и здрава животна средина“,
порача Сиљановска-Давкова.
Во својата порака, претседателката се наврати на главните обележја на годината што изминува, оценувајќи ја 2025 како година исполнета со промени на меѓународната сцена и значајни процеси во земјата.
Таа истакна дека на домашен план се покренати значајни процеси – отворање битка со корупцијата и криминалот, креирање национална развојна стратегија, воспоставување нови стратешки партнерства во функција на економски и други реформи, инфраструктурна офанзива, долгорочно решавање на енергетското прашање, системско решавање на соработката со дијаспората.
Како најтемен момент на 2025 година, Сиљановска-Давкова ја издвои трагедијата во Кочани. Таа упати порака дека државата има обврска да обезбеди правда за жртвите и за нивните најблиски.
„Нивната немерлива жртва мора да направи подобри луѓе од сите нас, но и политички и правен систем којшто нема да дозволи нови невини жртви“,
додава таа.
Претседателката упати желби до сите генерации велејќи оти секому му посакува Нова година каква што најмногу сака.