Поради нападот, големи пожари избувнаа во два облакодери во Киев, изјави градоначалникот Виталиј Кличко на платформата Телеграм
Околу 600 000 потрошувачи во Киев и околниот регион останаа без електрична енергија по синоќешниот руски напад на украинската престолнина. Енергетските екипи се на терен и вложуваат максимални напори за што поскоро враќање на снабдувањето, објави премиерката на Украина, Јулија Свириденко, на социјалните мрежи.
„Работиме на решавање на последиците од ноќниот напад врз Киев и регионот. Предупредувањето за воздушна опасност во Киев беше во сила 10 часа. Една жена почина во регионот на Киев. Во главниот град досега се повредени 32 лица“,
рече Свириденко.
Службите за итни случаи се на терен, кои заедно со медицинските екипи ги расчистуваат урнатините и им пружаат помош на жртвите. Премиерката додаде дека во нападот се оштетени цивилни и енергетски објекти.
„Станбени згради и енергетски објекти, како и зграда на едно министерство, беа оштетени во нападот“,
изјави таа.
Поради нападот, големи пожари избувнаа во два облакодери во Киев, изјави градоначалникот Виталиј Кличко на платформата Телеграм.
Греење немаат илјадници домови во градот со три милиони жители, а беа регистрирани и прекини на електричната енергија.
„Во моментов, над 2 600 станбени згради, 187 градинки, 138 училишта и 22 социјални згради се без централно греење. Добавувачите на енергија и локалните власти работат на враќање на снабдувањето со електрична енергија и греење“,
рече Кличко.