Во меѓувреме, во видеообраќање од Брисел, претседателот на СДСМ, Венко Филипче, најави дека ќе побара помош од цела Европа, од сите прогресивни сили и од сестринските партии во врска со усвоената Резолуција предложена од владејачката ВМРО-ДПМНЕ
Потпретседателката на СДСМ, Јована Тренчевска, најави дека партијата до Уставниот суд ќе поднесе претставка за уривање на правниот поредок откако владејачкото мнозинство вчера во Собранието усвои „Резолуција за осуда на манипулациите на опозицијата и за потврда на политиките против нелегалната миграција“ поднесена од пратеничката група на ВМРО-ДПМНЕ.
СДСМ ја оцени Резолуцијата за неуставна, додавајќи дека претставува вовед кон автократија, диктатура и режим.
„СДСМ ова нема да го дозволи и силно ќе се спротивстави, заедно со граѓаните. Предавничката Резолуција е спротивна на Уставот во делот на основни човекови слободи и права на граѓанинот – слободата на изразување која е неприкосновена. И тоа ја прави неуставна. ДПМНЕ и ЗНАМ усвоија неуставна Резолуција со која директно се загрозуваат слободата на говорот и слободата на политичко дејствување на опозицијата. Целта на власта е да ја замолчи опозицијата и да се забрани било каква дебата за договорот – мигранти за пари, да се спречи вистината да излезе на виделина. Нема да дозволиме гушење на демократијата и слободата на говор!“,
порача Тренчевска од пред Уставниот суд.
Потпретседателката на СДСМ најави дека партијата ќе се обрати и до сите релевантни меѓународни институции, а ќе побара помош и од институциите на Европската Унија и од сестринските партии во Европа.
Во меѓувреме, во видеообраќање од Брисел, претседателот на СДСМ, Венко Филипче, најави дека ќе побара помош од цела Европа, од сите прогресивни сили и од сестринските партии во врска со усвоената Резолуција предложена од владејачката ВМРО-ДПМНЕ.
„Донесената срамна Резолуција на ДПМНЕ и ЗНАМ во Собранието е директен удар врз демократијата, слободата на говор, мислењето и политичкото дејствување. Кога парламент носи неуставна резолуција против опозицијата, тогаш државата престанува да биде демократска и влегува во авторитаризам, во режим. Власта сака да ја замолчи и да ја забрани работата на опозицијата, да создаде еднопартиска држава и да ја згасне слободата на говор“,
порача Филипче.
Претходно вчера, со 65 гласа „за“ и пет гласа „против“ пратениците ја изгласаа „Резолуцијата за осуда на манипулациите на опозицијата и за потврда на политиките против нелегалната миграција“, поднесена од пратеничката група на ВМРО-ДПМНЕ. Координаторот на пратеничката група на ВМРО-ДПМНЕ, Никола Мицевски, нагласи со оваа Резолуција се става крај на сите шпекулации во врска со мигрантите.