На настанот настапи хор составен од десетици деца од повеќе скопски училишта кои изведоа празнични песни, а присутните на плоштадот имаа можност да уживаат и во балетска претстава
На скопскиот плоштад „Македонија“, во присуство на жители на главниот град и граѓани од целата држава, вечерва свечено беше осветлена новогодишната елка и отворен Божиќниот маркет, со што и официјално започна празничната програма „Скопје – новогодишна зимска бајка“, која ќе трае до 31 декември.
Копчето со кое беа активирани светилките на елката симболично го притисна градоначалникот на Скопје, Орце Ѓорѓиевски.
Претходно на настанот настапи хор составен од десетици деца од повеќе скопски училишта кои изведоа празнични песни, а присутните на плоштадот имаа можност да уживаат и во балетска претстава.
Градоначалникот на Скопје, Орце Ѓорѓиевски, денеска на прес-конференција заедно со неколку македонски пејачи ја претстави програмата за новогодишната прослава во главниот град.
Рече дека целта на новогодишната програма е Скопје да се позиционира како современа европска метропола со континуирана и разновидна празнична содржина за сите генерации.
Како што беше кажано, во периодот од 15 до 31 декември, од 18 часот, граѓаните ќе можат да уживаат во богата програма со музички настапи, диџеј-сетови и уметнички изведби.
Централниот дел од програмата почнува на 27 декември во соработка со Државната лотарија на Македонија, каде што ќе учествуваат и средношколски бендови од сите средни училишта од Скопје, додавајќи дека негова желба оваа година е сите настапи да бидат од македонски изведувачи.
Прославата на новогодишната ноќ ќе биде резервирана за настапи на македонските музички изведувачи, како Каролина Гочева, Тамара Тодевска, Миле Кузмановски, Огнен Здравковски, „Куку леле“, „2 бона“ и други.
На 27 декември во 12 часот Дедо Мраз ќе ги пречека децата на плоштадот.
Одговарајќи на новинарско прашање за тоа колкав ќе биде трошокот на градот за ваквата прослава, тој рече дека единствен трошок е украсувањето, кое, како што додаде, изнесува помалку од 70 000 евра.
За тоа дали ќе има и албански изведувачи, кажа дека музиката не познава вера и нација и повика на обединување посочувајќи дека програмата е наменета за сите скопјани.
Градоначалникот на Скопје најави дека и тој ќе ја пречека новата година на плоштадот, заедно со сите присутни граѓани.
Според него, пристигнувањето на новата 2026 година нема да биде одбележано со огномет. За иницијативата на „Зелен хуман град“ за забрана на огномети, додаде дека Градот не е надлежен за ова прашање.
Главниот град ќе остане накитен до 18 јануари.