Бранителката на Милковски посочи дека поднеле барање до Обвинителството да се дозволи да биде отворена гаражата што е залепена до објектот каде што беше „Пулс“, а кој не е оштетен, бидејќи во него се наоѓа голем дел од документите за објектот
Обвинетиот Гроздан Милковски не знаел дека објектот што му го издал Дејан Јованов-Деко ќе го адаптира во простор за угостителска дејност.
Ова во својот воведен говор го кажа бранителката на Милковски, Лидија Ристовска, а во рамките на денешното продолжение на судскиот процес за пожарот во т.н. кабаре „Пулс“ во Кочани.
Во таа насока таа реторички праша врз основа на што и на кои докази на нејзиниот клиент му става на товар делото тешки дела против општата сигурност, односно дека го предизвикал пожарот.
Таа го покажа договорот за закуп со кој објектот чиј сопственик е Милковски му бил издаден на Дејан Јованов, каде што не било наведено дека објектот ќе биде пренаменет за угостителска дејност.
„Во дејствијата на Милковски не се исполнети условите за кривичните дела што му се ставаат на товар. Кај Милковски не постои ниту еден доказ дека е вмешан во сторувањето на делата“,
рече таа.
Во дополнение на воведниот говор таа кажа дека Милковски не бил известен од првообвинетиот каква дејност ќе извршува во објектот.
„Гроздан не дал согласност за внатрешна адаптација на издадениот простор. Дека е тоа така произлезе од изведувањето на доказите како на Обвинителството така и на одбраната“,
рече адвокатката.
Таа посочи дека поднеле барање до Обвинителството да се дозволи да биде отворена гаражата што е залепена до објектот каде беше „Пулс“, а кој не е оштетен, бидејќи во него се наоѓа голем дел од документите за објектот.
Овие документи, како што кажа, имаат намера да ги дадат како дополнување во доказната постапка.
Адвокатот Димче Ристов, кој е бранител на обвинетата Милка Едровска, во својот воведен говор кажа дека со доказите што ќе ги изнесат во текот на постапката ќе докажат дека таа воопшто не е виновна за пожарот.
Адвокатот наведе дека во јавноста се создала погрешна претстава дека Едровска го адаптирала објектот за кабаре.
Според него, таа како вработена во фирмата „Венци“ ДООЕЛ Кочани била ангажирана од Дејан Јованов само да изготви решение за паркинг-простор пред објектот.
„Милка Едровска не е творец на кобната дискотека, како што се мисли во јавноста“,
рече Ристов.
Дека тоа не е така произлезе од доказите што ги предлагаме, но и од доказите на тужителот во делот на градежните вештачења кои се приложени како доказ, но и од вештачењето приложено од страна на одбраната.
„Од тие докази ќе произлезе дека обвинетата не е архитект кој уредува внатрешни површини, туку градежен инженер која од 2012 година ги има сите овластувања од Градежната комора на Република Македонија за заштита при работа и за противпожарна заштита“,
рече адвокатот.
Тој даде општи информации за објектот. Наведе дека станува збор за објект од втора категорија под надлежност на општината, во случајот Општина Кочани.
Објектот бил наменет за деловно-магацински простор во периодот од 1999 до 2001 година врз основа на проект на фирмата „ПИК Зорвес Кочани“.
Според овој проект, како што кажа објектот имал дозвола за работа како деловно-магацински простор од лесна индустрија.
„Сметано од изградбата на објектот до случувањето на настанот не е извршена пренамена или реконструкција на објектот во таков во кој ќе се врши угостителска дејност“,
рече тој.
Неговата клиентка првпат била работно ангажирана од Дејан Јованов да изготви сообраќајно решение за паркинг-места пред објектот. Тоа е стриктен дел од договорот меѓу нив.
Самата обвинета констатира дека објектот е деловно-магацински, а делот кој е адаптиран се наоѓа на катот од објектот. Таа не ја адаптирала дискотеката, туку тоа го направил Виктор Апостолов, архитект од Кочани, според чии скици обвинетиот го преадаптирал објектот.
„Чуди зошто ова лице не се јавува никаде во оваа постапка, макар како сведок. Ние од наша страна го предлагаме како сведок“,
рече адвокатот.
Тој кажа дека проектот не поминал на ревизија и МВР и Министерството за економија не требало да издадат лиценца за работа како кабаре.
Во дополнение на воведниот збор на адвокатот, сопственикот на фирмата „Венци“ ДООЕЛ Кочани, Венцислав Едровски рече дека документот што тие го издале во 2012 година бил со важност од шест месеци, а се користел 10 години.
„Ние бевме изманипулирани“,
рече тој.
Претходно сите 35 обвинети физички лица и претставниците на трите фирми за пожарот во т.н. кабаре „Пулс“ се изјаснија дека не се чувствуваат виновни за кривичните дела што им се ставаат на товар.
Поврзани вести:
- Одбраната на сопственикот на „Пулс“ вината за пожарот ја лоцира кај групата ДНК и институциите – Деко не знаел за пиротехниката
- Газдата на „Пулс“ се расплака во судницата: Се грижев за гостите, да знаев дека има пропусти ќе ги отстранев
- Сите обвинети за пожарот во „Пулс“ се изјаснија дека не чувствуваат вина
- Во ќелијата на Џеваир Камбери, обвинет за „Пулс“, се најдени 13 мобилни телефони и лаптоп
- Судот го одложи утрешното рочиште за „Пулс“, следното го закажа за 2 декември
- Денеска нема да има изјаснување за вина на обвинетите во „Пулс“, дел не го добиле обвинението
- (ВИДЕО) Родители на загинати во „Пулс“ вербално „нападнаа“ адвокати од Кочани: За колку пари ги браните убијците на нашите деца
- Хаотични докази, ново обвинение и недобиени материјали – одбраната во „Пулс“ со бројни забелешки до Обвинителството
- Мора да има правда за нашите деца, судијката и Обвинителството ни дадоа надеж – вели мајка на загинат во „Пулс“