Освен затворање на кујната како потенцијален извор на зараза, наредено е вонредно чистење и вонредни здравствени прегледи на вработените во училиштето. Земени се мостри од работните површини, но директорот на ДЗСИ, Кирил Лазов, вели дека за детали ќе мора да се почекаат официјалните резултати
По протокол, Државниот санитарен и здравствен инспекторат (ДЗСИ) ја затвори кујната во ОУ „Димо Хаџи Димов“ во скопско Влае по сомнежот за труење на ученици.
Директорот на ДЗСИ, доктор Кирил Лазов, во изјава за медиумите вели дека по добиеното известување од Центарот за јавно здравје за пројавени стомачни тегоби кај ученици од ова училиште, на терен се врши вонреден и координиран инспекциски надзор заедно со АХВ, ИЈЗ и ЦЈЗ Скопје.
Освен затворање на кујната како потенцијален извор на зараза, наредени се вонредно чистење и вонредни здравствени прегледи на вработените во училиштето. Земени се мостри од работните површини, но директорот на ДЗСИ вели дека за детали ќе мора да се почекаат официјалните резултати.
„Согласно своите надлежности, ДСЗИ изврши затворање на кујната како потенцијален извор на зараза и даде решение за забрана, во кое се наложуваат и мерки кои треба да ги преземе операторот, односно вонредно чистење, вонредна дезинфекција, дезинсекција и дератизација од овластена институција и спроведување вонредни здравствено-хигиенски мерки за вработените“,
изјави Лазов.
За водата, како што рече, не е надлежна ДЗСИ.
На прашањето за бројката на деца кои пројавиле симптоми, Лазов рече дека по констатирањето на фактичката состојба ќе бидат изнесени поконкретни информации. Додаде дека повеќе деца се јавени на преглед, но не сакаше да даде повеќе детали.