„Нема друго, роковите од денес почнаа да течат, а ние почнуваме со подготовки“, вели Лимани
Актуелниот вршител на должноста градоначалник на Општина Гостивар и кандидат од последните локални избори, Ваљбон Лимани, потврди дека повторно ќе влезе во трката за градоначалничката функција.
Лимани ја потврди својата кандидатура на настан во Гостивар, одговарајќи на новинарско прашање веднаш по распишувањето на повторените локални избори во четирите општини каде што не беше постигнат потребниот цензус.
„Јас повторно ќе бидам кандидат. Граѓаните на тој ден ќе го кажат својот збор“,
изјави Лимани.
Лимани се осврна и на одлуката на Државната изборна комисија (ДИК) за датумот на гласањето, кое е закажано за 11 јануари.
Тој посочи дека тие барале повторените избори да се одржат во декември, со краен датум 28 декември.
„Во Државната изборна комисија го сметаат датумот кога завршува целиот изборен процес и согласно на тоа го одреди 11 јануари. Нема друго, роковите од денес почнаа да течат, а ние почнуваме со подготовки“,
додаде Лимани.
На претходното гласање, Лимани беше кандидат на коалицијата „Национална алијанса за интеграција“ (НАИ). Тој освои 61,39 отсто, односно 16 949 гласови.
Лимани не успеа да победи во првиот круг бидејќи не беше исполнет законскиот цензус за излезеност.
Денеска, претседателот на Собранието, Африм Гаши, ги распиша повторените локални избори во четири општини – Гостивар, Врапчиште, Маврово и Ростуше и во Центар Жупа.