Муцунски верува дека во следните денови ќе биде постигнат договор кој ќе биде насочен кон зголемена ефикасност на Владата
Министерот за надворешни работи, Тимчо Муцунски, денеска потврди дека коалициските партнери одржуваат тековна комуникација за иднината на коалицијата. Тој повеќе детали не откри нагласувајќи дека договорите треба прво да се постигнат меѓусебно.
Запрашан што очекува од вечерашната средба на коалициските партнери и дали ВМРО-ДПМНЕ ќе „ослободи место“ за уште едно ново име да седне во Владата, Муцунски истакна дека договарањето не треба да се прави преку медиумите.
„Не сметам дека договарањето или воспоставувањето на условите треба да го правиме преку медиумите. Тоа се прашања што треба прво меѓусебно да ги договориме, а потоа да ги објавиме. Така се гради доверба“,
рече Муцунски.
Земајќи го во предвид функционирањето на коалицијата изминатата година и половина, рече дека со сите предизвици генерално доста успешно соработувале и имале заеднички капацитет да ги надминат.
Муцунски верува дека во следните денови ќе биде постигнат договор кој ќе биде насочен кон зголемена ефикасност на Владата.
Според Муцунски, прашањето не е во бројот на местата што ќе ги добијат коалициските партнери, туку во квалитетот на поединците.
„Една работа што сакам да ја повторам е дека не се работи за бројот на местата на коалициските партнери, се работи за прашањето за капацитетот на поединците, нивното знаење, нивното искуство и како тие ќе придонесат кон институциите што посакуваат да ги предводат“,
кажа Муцунски.
Тој вели дека приоритет на сите коалициски партнери треба да биде „помалку да се фокусираме на квантитет, а повеќе на квалитет“.
Инаку, вчера вицепремиерот задолжен за политики за добро владеење, Арбен Фетаи рече дека сите во коалицијата ВЛЕН се согласни и го делат мислењето дека по изборот на Изет Меџити за градоначалник на Општина Чаир, на неговото место во Владата треба да дојде Беким Сали.
За најавената реконструкција на Владата, премиерот Христијан Мицкоски минатата недела рече како партија се фокусирани на партискиот конгрес што треба да се одржи на 6 декември, но оти паралелно со тоа ќе размислува за одредени кадровски поместувања во Владата, доколку има потреба за тоа.
Она што засега е извесно е дека ќе има нови лица на позицијата прв вицепремиер и министер за животна средина и просторно планирање, откако Изет Меџити стана градоначалник на Чаир, како и во ресорот за односи меѓу заедниците, чиј министер Иван Стоиљковиќ влезе во Советот на Општина Куманово како кандидат на Демократската партија на Србите во Македонија, чиј претседател е тој.
Инаку, откако Изет Меџити седна во градоначалничката фотелја, од ВЛЕН рекоа дека негов наследник на позицијата прв вицепремиер во Владата ќе биде Беким Сали, а за министерската функција во Министерството за животна средина и просторно планирање ќе биде предложен друг кандидат