Ѓорѓиевски најави и дека фокусот на новата градска управа ќе биде ставен на еколошките политики и посочи дека чистиот воздух, многуте зелени површини и решенијата за отпадот се темелите на еден здрав град. Тој порача дека Скопје мора да стане лидер во еколошките политики со конкретни и видливи резултати
Градоначалникот на Скопје, Орце Ѓорѓиевски, на првата конститутивна седница на Советот на Град Скопје најави дека вчера започнатата акција за генерално чистење на градот ќе прерасне во континуирана обврска и нема да биде краткотрајна.
„Завршува времето кога Скопје беше град на депонијата. Започнавме генералка за чистење и тоа нема да биде само 72-часовна акција, тоа ќе продолжи во континуитет секој ден“,
изјави Ѓорѓиевски.
Градоначалникот рече дека акцијата не е само маркетинг и истакна дека чистењето е основна должност за која граѓаните плаќаат.
„Она што вчера го почнавме не е маркетинг, туку за да покажеме дека кога се сака сè се може. Тоа е всушност наша обврска, а за тоа граѓаните нè плаќаат“,
додаде тој.
Ѓорѓиевски најави и дека фокусот на новата градска управа ќе биде ставен на еколошките политики и посочи дека чистиот воздух, многуте зелени површини и решенијата за отпадот се темелите на еден здрав град. Тој порача дека Скопје мора да стане лидер во еколошките политики со конкретни и видливи резултати.
Тој ја нагласи потребата од соработка, одговорност и транспарентност и кажа дека овој Совет има историска задача да го насочи Скопје кон стабилен, функционален и одржлив развој.
„Оваа седница е чин од каде испраќаме силна порака дека демократијата живее преку одговорноста, соработката и визијата за подобро Скопје. Кога политиката ќе ги стави интересите на граѓаните пред сè, резултатите се видливи, конкретни и трајни“,
рече Ѓорѓиевски.
Тој во говорот пред советниците повтори дел од приоритетите на кои ќе се фокусира во работењето.
Еден е обезбедување ефикасен јавен превоз, кој ќе биде модернизиран и кој ќе ги поврзува сите делови во градот. Ѓорѓиевски најави набавка на нови автобуси, подобрување на сообраќајната сигнализација и безбедноста на улиците.
Во делот на урбанизацијата на градот, тој рече дека нема да дозволи таа да биде хаотична, туку планирана и во интерес на граѓаните.
„Ќе се залагаме за рамнотежа меѓу развојот и заштитата на јавниот простор“,
Транспарентноста, Ѓорѓиевски рече дека ќе биде еден од приоритетите на која ќе се фокусира најавувајќи дека граѓаните ќе знаат како се троши секој денар од градскиот буџет.
Обраќајќи се кон советниците, Ѓорѓиевски потенцираше дека нивната улога е клучна и ги повика на соработка, без разлика на политичката припадност, со цел да се направи Скопје подобро место за живеење.
Инаку, синоќа од пред платото на спортскиот центар „Борис Трајковски“ започна големата акција што ја најави градоначалникот на Скопје Орце Ѓорѓиевски, „72 часа чисто Скопје“. На платото пред спортскиот центар се наоѓаат десетици камиони, цистерни и механизација подготвени за чистење на Скопје.
Пред да ја почне акцијата Ѓорѓиевски во градоначалничкиот кабинет имаше средба со досегашната градоначалничка Данела Арсовска за која рече дека била протоколарна.