Лидерот на партијата, Венко Филипче, синоќа на прес-конференција по вториот круг од локалните избори, рече дека не планира да поднесе оставка од функцијата претседател на СДСМ и потврди дека Ана Чупеска поднела оставка од позицијата потпретседателка на СДСМ
Кандидатот за градоначалник на Ѓорче Петров од СДСМ и претседател на општинската организација на партијата, Костадин Ацевски, денеска поднесе неотповиклива оставка од функцијата поради, како што посочува во видеообраќање на Фејсбук, лошите резултати на изборите.
Тој повика оставка да поднесе и целото раководство на СДСМ.
„Иако се вложив целосно, без калкулации, сепак резултат е лош. Поднесувам неотповиклива оставка од функцијата претседател на општинската организација. Верувам дека е исправно и потребно e оставка да поднесат и претседателот Филипче и целото раководство на СДСМ. Не само заради лошите резултати, туку и заради начинот на дејствување на СДСМ во изминатиот период“,
вели Ацевски во видеообраќањето.
Лидерот на партијата, Венко Филипче, синоќа на прес-конференција по вториот круг од локалните избори, рече дека не планира да поднесе оставка од функцијата претседател на СДСМ и додаде дека овие избори се јасен патоказ за партијата и за него како лидер за тоа какви политички и кадровски промени треба да се направат во наредниот период.
„Ќе има седници на Извршниот и Централниот одбор на кои ќе ги обзнанам тие промени и секако ќе планираме и организираме конгрес на кој ќе се дискутираат политиките за наредниот период. Сметам дека тоа што се направи во партијата изминатиот период, после еден таков навистина катастрофален пораз лани, беше консолидација, меѓутоа секако дека овие избори се дополнителен показател од кој ќе влечеме пораки и поуки за во иднина“,
порача Филипче.
Тој во одговор на новинарско прашање потврди дека Ана Чупеска поднела оставка од позицијата потпретседателка на СДСМ и најави оти соработката со неа ќе продолжи во друга форма.