Трамп, како што претходно објави медиумот, не ги тргнал целосно ракетите од маса, а администрацијата изготвила планови за брзо обезбедување на Украина доколку Трамп даде наредба
Пентагон ѝ даде зелено светло на Белата куќа да ѝ обезбеди на Украина ракети „томахавк“ со долг дострел, откако процени дека тоа нема да влијае негативно на американските залихи, пишува Си-ен-ен. Повикувајќи се на тројца американски и европски функционери што се запознаени со ова прашање, медиумот пренесува дека конечната политичка одлука е во рацете на претседателот Доналд Трамп.
Трамп претходно овој месец за време на работен ручек со украинскиот претседател Володимир Зеленски во Белата куќа изјави дека не би сакал да ѝ ги обезбеди ракетите на Украина, велејќи „не сакаме да даваме работи што ни се потребни за да ја заштитиме нашата земја“.
Здружениот штаб на вооружените сили ја информира Белата куќа за својата проценка непосредно пред Трамп да се сретне со Зеленски, кој инсистираше на ракетите за поефикасно да ги таргетираат нафтените и енергетските постројки длабоко во Русија.
Инаку, ракетите „томахавк“ имаат дострел од околу 1 600 километри.
Трамп, неколку дена пред средбата со Зеленски, рече дека САД имаат многу „томахавк“ што потенцијално би можеле да ѝ ги дадат на Украина.
Но, подоцна американските и европските претставници беа изненадени кога Трамп го промени ставот за неколку дена велејќи, за време на воведниот говор на работниот ручек во Белата куќа со Зеленски, дека на САД им се потребни „томахавк“.
Одлуката на Трамп дојде еден ден откако тој разговараше по телефон со рускиот претседател Владимир Путин, кој му рече на Трамп дека „томахавк“ би можеле да ги погодат големите руски градови како Москва и Санкт Петербург, нема да имаат значително влијание на бојното поле, но ќе ги оштетат односите меѓу САД и Русија, додава Си-ен-ен.
Трамп, како што претходно објави медиумот, не ги тргнал целосно ракетите од маса, а администрацијата изготвила планови за брзо обезбедување на Украина доколку Трамп даде наредба.
Трамп во последните денови е фрустриран од неподготвеноста на Путин сериозно да размисли за мировни преговори. Тој минатата недела одобри нови санкции на САД врз руските нафтени компании и засега го откажа планираниот состанок со Путин во Будимпешта за да разговара за Украина.
Иако Пентагон нема загриженост за залихите, американските одбранбени претставници сè уште размислуваат за тоа како Украина ќе се обучува и ќе ги распоредува ракетите, велат претставниците. Сè уште има неколку оперативни прашања што ќе треба да се решат за Украина да може ефикасно да ги користи ракетите, додаваат изворите.
Едно отворено прашање е како Украина ќе ги испали ракетите ако САД ги обезбедат. „Томахавк“ најчесто се лансираат од површински бродови или подморници, но морнарицата на Украина е сериозно исцрпена, па ракетите веројатно ќе треба да се лансираат на копно.
Во објава на Икс претходно неделава, Зеленски рече дека Украина се надева оти ќе ги прошири своите капацитети за долг дострел до крајот на оваа година, за да може војната да заврши „под фер услови“ за земјата.
„Глобалните санкции и нашата прецизност практично се синхронизираат за да ја завршат оваа војна под фер услови за Украина. Сите цели за длабок удар мора целосно да бидат фиксирани до крајот на годината, вклучително и проширување на нашето долгодострелно влијание“,
напиша тој.