Фотографија на Лукровски со Мојсова вечерва на социјалните мрежи ги засили коментарите дека СДСМ му дава поддршка на Лукровски во вториот круг за Карпош во кој тој се трка со Стевчо Јакимовски
Од СДСМ соопштија дека не го поддржуваат кандидатот на Мицкоски и ВМРО-ДПМНЕ против кој се бореше партијата во вториот круг
Кандидатот за градоначалник на Општина Карпош од владејачката ВМРО-ДПМНЕ, Сотир Лукровски, вечерва на социјалната мрежа Фејсбук објави фотографија со кандидатката за градоначалник за истата општина од Социјалдемократскиот сојуз (СДСМ), Маја Мојсова-Мијовска, која не влезе во вториот круг.
Како што пишува во неговата објава, фотографијата е од средба во Карпош, а можноста ја искористил да поразговараат за проекти за општината.
„Во срцето на Карпош секогаш ќе сретнеш вистински карпошани. Со Маја се знаеме од многу одамна, ја искористив можноста да поразговараме за проектите кои значат за нашата општина и за нашите сограѓани. Заедно ќе ги реализираме, како и многу години наназад“,
пишува Лукровски на Фејсбук.
Фотографијата на Лукровски со Мојсова е причина што вечерва на социјалните мрежи се засилија коментарите дека, всушност, СДСМ му дава поддршка на Лукровски во вториот круг за Карпош во кој се трка со Стевчо Јакимовски од ГРОМ („Искуство за успех”).
Еден час по објавата на Лукровски, СДСМ демантираше дека му даваат поддршка на Лукровски во вториот круг.
„Во целост ги демантираме шпекулациите дека фотографијата на Маја Мојсова со кандидатот на ВМРО-ДПМНЕ, Сотир Лукторвски, е каква било поддршка од СДСМ. Не го поддржуваме кандидатот на Мицкоски и ВМРО-ДПМНЕ против кој се бореше партијата во вториот круг“,
пишува во партиската реакција.
Оттаму додаваат дека ќе побараат објаснување од Маја Мојсова за фотографијата.
Во првиот круг Лукровски освои 10 284 гласа, а Мојсова 3 827. Во вториот круг со Лукровски се трка Јакимовски кој во првиот освои 8 761 гласа.