Според цитираниот член од Кривичниот законик, тој и лицето приведено со него се сомничат за загрозување на животната средина и природата со отпадни материи. Ова околност сугерира дека активностите на Обвинителството и полицијата се поврзани со проблемот со несобирањето на сметот во главниот град, поради што минатата недела истражните органи отворија постапка
Две лица од раководството на Јавното претпријатие „Комунална хигиена“ – Скопје денеска се приведени во врска со сомненија за кривично дело од член 230 од Кривичниот законик (КЗ), соопштија од Јавното обвинителство на Република Северна Македонија.
„По наредба на Основното јавно обвинителство Скопје, полициски службеници преземаат дејствија за обезбедување докази. Приведени се и задржани две лица од раководството на ЈП ‘Комунална хигиена’ – Скопје, во врска со сомненија за кривично дело од член 230 од Кривичниот законик“,
се наведува во информацијата од Обвинителството.
Едно од лицата лишени од слобода, како што дознава „360 степени“ од свои извори, е актуелниот директор на ЈП „Комунална хигиена“ – Скопје, Сабахудин Рустеми, кој е кадар на ДУИ.
Според цитираниот член од Кривичниот законик, тој и лицето приведено со него се сомничат за загрозување на животната средина и природата со отпадни материи.
Ова околност сугерира дека активностите на Обвинителството и полицијата се поврзани со проблемот со несобирањето на сметот во главниот град, поради што минатата недела истражните органи отворија постапка.
Дека се лишени од слобода две лица од раководството на скопското комунално претпријатие за „360 степени“ потврдија и од Министерството за внатрешни работи (МВР).
„Полициски службеници по наредба на Основното јавно обвинителство Скопје денеска лишија од слобода две лица од раководството на ЈП ‘Комунална хигиена’ – Скопје, во врска со сомненија за кривично дело од член 230 од Кривичниот законик“,
се вели во информацијата од МВР.
За потсетување, Основното јавно обвинителство Скопје минатиот вторник информира дека почнало постапка и презема дејствија за обезбедување докази за евентуално кривично дело во врска со проблемот со сметот во главниот град.
Оттаму тогаш рекоа дека јавен обвинител издал наредби до Министерството за внатрешни работи и до другите надлежни органи итно да постапат и да извршат проверки за работењето на ЈП „Комунална хигиена“ – Скопје.
Владата, пак, претходно соопшти дека го задолжила Министерството за внатрешни работи во координација со Државниот комунален инспекторат, Државниот инспекторат за животна средина, Државниот санитарен и здравствен инспекторат и Институтот за јавно здравје да извршат вонреден инспекциски надзор во Град Скопје и во „Комунална хигиена“ со цел да се утврди состојбата со отпадот во главниот град и да се преземат соодветни мерки.
Инаку, денеска премиерот Христијан Мицкоски, одговарајќи на новинарско прашање, кажа дека проблемот со сметот во главниот град ќе има разврска која ќе биде многу интересно да се следи.
Членот 230 од Кривичниот законик врз основа на кој се приведени Рустеми и другиот раководител во јавното претпријатие има шест става, од кои првиот гласи:
„Тој што со оставање, фрлање, собирање, со непрописно транспортирање на една или повеќе поврзани пратки, со преработка или отстранување на отпадот, со создавање на депонии спротивно на прописите за заштита на животната средина, пропуштање на вршење надзор над собирањето, со транспортот и преработката, со непрописно управување со отпадот, или на друг начин ќе предизвика или може да предизвика значително оштетување на квалитетот на почвата, воздухот или водата или опасност за животот или здравјето на луѓето или уништување на растителен или животински свет во поголеми размери, или на ретки видови на растенија или животни, ќе се казни со затвор од една до десет години“.
Наредниот став се однесува на несоодветно постапување со опасен отпад, ставот е ако делото од ставот 1 е сторено од небрежност, за што е предвидена парична казна со затвор до три години, а во случајот од ставот 2 со затвор од една до пет години.
За неовластена трговија со отпад, според ставот 4, е предвидена казна од една до пет години.
Според ставот 5, ако делото е сторено од организирана група составена од три или повеќе лица – сторителот ќе се казни за делото од ставовите 1 и 4 на овој член со затвор од најмалку четири години, а за делото од ставот 2 на најмалку осум години.
„Ако делото од овој член го стори правно лице, ќе се казни со парична казна“,
се наведува во ставот 6 од членот 230 на КЗ.