Кандидатот на ЗНАМ за градоначалник на Центар смета дека е неопходно да се донесат нови, ревидирани урбанистички планови и да се зголеми безбедноста во училиштата
Кандидатот на ЗНАМ за градоначалник на Општина Центар, Мирослав Лабудовиќ, вели дека е потребна добра организација во однос на хигиената во општината, но не само поради актуелната ситуација со сметот.
„Не зборувам за ова сега што ни се случува, собирање на смет. Зборувам за нехигиената во маалата“,
изјави Лабудовиќ во интервју за „360 степени“ на МРТ 1.
Понатаму, вели тој, на општината ѝ е потребна и комплетна дигитализација, каде што човечкиот фактор ќе биде сведен скоро на минимум.
„Бидејќи само така граѓаните ќе имаат поголема следливост и транспарентност во сите процеси. Бидејќи секое барање треба да помине низ службите и тоа треба да има одредена дигитална следливост и да не се заборава во одредена фиока каде што може да предизвика сомнеж за корупција. Затоа дигитализацијата на општината е многу важна“,
рече тој.
Понатаму, вели Лабудовиќ, неопходно е носење на нови, ревидирани урбанистички планови и безбедност во училиштата.
Прашан кои се неговите предлог-решенија во делот на сообраќајот и на паркирањето, Лабудовиќ одговара дека се потребни катни гаражи и организација на сообраќајот.
„Катни гаражи, монтажни гаражи и организација на сервисно-станбените улици. Катна гаража во ‘Буњаковец’, на местото на постоечката монтажна гаража во близина на „Песталоци“. Таму би се организирало тоа цело паркирање. Секоја кола што влегува во тој дел од градот да се паркира таму и да си плаќа нормално. А сервисно-станбените улици во ‘Буњаковец’, коишто веќе се преоптоварени и нема паркинг-место, да бидат за граѓаните. Со добра анализа ќе процениме дали некои од улиците би биле со комбиниран начин. На пример, од 7:30 наутро до 16:30 да се наплаќа тој период, а по 16:30 да биде за резидентно паркирање“,
вели кандидатот на ЗНАМ.
Тој додава дека на коцката пред општинските бараки треба да има нов плоштад, а монтажни гаражи да се направат и во населбата Капиштец.
Како актуелен член на Владата (заменик-министер за енергетика), Лабудовиќ беше прашан што таа може(ше) да направи за акутниот проблем со ѓубрето во Скопје.
„Претпоставувам дека во даден момент се прели чашата со целата оваа неубава работа што му се случува на Скопје. Нели, одговорноста за собирање на сметот е на ’Комунална хигиена’. Нешто се случува таму. Претпоставувам дека е недоволна грижа на камионите што го собираат сметот. Претпоставувам, не сакам да навлегувам во детали. Кога ќе влезат соодветни институции да прегледаат што е проблемот, ќе биде, верувам, транспарентно кажано во јавноста“,
одговара тој.
На прашањето дали Владата можеше да ги одземе ингеренциите на локалната самоуправа во тој сегмент на ниво на Скопје, Лабудовиќ посочи на поддршката што деновиве дојде од општините Кавадарци, Штип, Куманово и други.
„Дојдоа, помогнаа да не се шират заразите. Имавме проблем каде што дете беше каснато од стаорец. Имаме сериозен проблем во градот. Значи, таа дератизација, дезинфекција, мора соодветно, на правилен начин да се води. Од каде излегоа толку глувци одеднаш? Значи, претходно во центарот на градот тие процеси не биле правилно спроведувани. Да беа правилно, немаше да ги имаме овие глувци, наезда на глувци да се собираат околу отпадот… Сега се реагира зошто пратиле камиони. А кога, не дај боже, во летниот период горат пожари, целата оператива од градовите на противпожарни возила се вклучуваат таму да помогнат“,
рече Лабудовиќ од ЗНАМ.