Сè уште актуелниот градоначалник на Струга, Рамиз Мерко, викендов преку објавата на Фејсбук им се обрати на, како што наведе во неа, вистинските и лојални поддржувачи, демантирајќи ги гласините дека во вториот круг ќе го поддржи кандидатот на „Националната алијанса за интеграција“ (НАИ), предводена од ДУИ, што ги подгреа шпекулациите дека градоначалникот кој е на „црната листа“ на САД, се обидува да се доближи до ВМРО-ДПМНЕ и до ВЛЕН
Апсолутно е неточно. Со овие зборови лидерот на ВМРО-ДПМНЕ и премиер, Христијан Мицкоски, денеска одговори на шпекулациите што деновиве се појавија во јавноста за наводни разговори меѓу актуелниот градоначалник на Струга во заминување, Рамиз Мерко, со ВМРО-ДПМНЕ и ВЛЕН за вториот круг од локалните избори.
Насловите на дел од порталите, од кои речиси сите со прашален знак на крајот, уследија по објавата на Мерко на социјалните мрежи дека во вториот круг од локалните избори в недела (2 ноември) нема да го поддржи кандидатот за градоначалник на Струга на „Националната алијанса за интеграција“ (НАИ), предводена од ДУИ.
„Јас, Рамиз Мерко, нема да го поддржам кандидатот на ‘Националната алијанса за интеграција’ (НАИ) во вториот круг од локалните избори“,
гласи дел од пораката што викендов на Фејсбук ја објави струшкиот градоначалник, кој се наоѓа на „црната листа“ и против кого се водат повеќе судски процеси.
Оваа негова одлука да им сврти грб на неговите сопартијци и да не го поддржи кандидатот на НАИ во Струга, Арсим Делипи, во јавноста беа протолкувани како обид на струшкиот градоначалник да се приближи до владејачките ВМРО-ДПМНЕ и ВЛЕН и ги подгреа шпекулациите дека во тек се изборни пазарења во замена за гласови.
Демант на ваквите наводи денеска стигна од лидерот на ВМРО-ДПМНЕ, Мицкоски, кој рече дека шпекулациите доаѓаат од портали кои се финансирани од еден ист центар, кој е разочаран од одлуката на Мерко да не ги поддржи ДУИ во вториот круг од локалните избори в недела.
„Претпоставувам сега за да најдат противтежа, како да направат сензација за да ја потонат таа вест, вадат во јавноста комплетна невистина. Многу пати во минатото ние сме го кажале нашиот став за Рамиз Мерко, така што, ете оставам на тој начин да прават и креираат сензација, инаку апсолутно е неточно“,
изјави Мицкоски одговарајќи на новинарско прашање по денешната посета на Градската општа болница „8 Септември“, по повод пуштањето во употреба на нова опрема на одделот за физикална терапија и рехабилитација.
Сè уште актуелниот градоначалник на Струга, Рамиз Мерко, викендов преку објавата на Фејсбук им се обрати на, како што наведе во неа, вистинските и лојални поддржувачи, демантирајќи ги гласините дека во вториот круг ќе го поддржи кандидатот на НАИ.
„Денес ви се обраќам директно и со максимална сериозност, за да го уништам веднаш новиот бран шпекулации и измислени гласини кои имаат за цел да ја поткопаат вашата доверба. Кружат гласини дека јас, Рамиз Мерко, ќе го поддржам кандидатот на НАИ во вториот круг. Би сакал да нагласам: ЈАС, РАМИЗ МЕРКО, НЕМА ДА ГО ПОДДРЖАМ КАНДИДАТОТ НА НАИ“,
напиша тој, додавајќи дека ваквите гласини се обид за манипулација од страна на оние „кои веќе се губитници и сакаат да влијаат врз гласачите“.
Мерко порача дека Листата на независни кандидати, која, како што вели, носи одлуки со длабински консултации, а не со гласини, наскоро ќе одржи состанок со сите кандидати за советници и клучни поддржувачи.
„По овој состанок, официјалниот портпарол на Независната листа ќе информира за сите точки (од состанокот) и за кандидатот што ќе го поддржат во вториот круг. Не дозволувајте никој да ви го одвлекува вниманието“,
наведе Мерко.
Инаку, трката за градоначалничката функција во Струга, во вториот круг ќе ја трчаат независниот кандидат поддржан од ВМРО-ДПМНЕ и ВЛЕН, Менди Ќура, и Арсим Далипи од „Националната алијанса за интеграција“ предводена од ДУИ.
Ако се цени по првиот круг, битката меѓу двајцата кандидати е многу тесна. Имено, на 19 октомври Менди Ќура освои 9 934 гласа, додека Арсим Далипи имаше 9 719 гласа.
Актуелниот струшки градоначалник, кој во неколку мандати ја водеше општината како кадар на ДУИ, на 9 јуни 2023 година се најде на „црната листа“ на САД поради сериозна корупција и мешање во судски процеси.