Герасимовски бара Владата да прогласи вонредна состојба поради состојбата со сметот

Градоначалникот на Центар информира дека утринава испратил и допис до Заедницата на единиците на локалната самоуправа (ЗЕЛС) и побарал да биде свикана итна седница за да се најде решение за проблемот со сметот

Градоначалникот на Општина Центар, Горан Герасимовски, бара Владата да прогласи вонредна состојба поради состојбата со сметот во градот. Информира дека јавното комунално претпријатие изминатите пет дена воопшто не се појавило на улиците во Центар за да го собере ѓубрето и вели оти состојбата е алармантна.

„Ова ги надминува сите граници. Се соочуваме со огромни проблеми, а набрзо не дај боже и зарази. Нашите хигиеничари се во две смени, имаме дополнителна механизација која и во утринските и во вечерните часови е на терен и правиме се за да го расчистиме сметот и она што не го прави ‘Комунална хигиена’ веќе подолг период, но овие пет дена е навистина алармантно“,

изјави утринава Герасимовски.

Градоначалникот на Центар информира дека утринава испратил и допис до Заедницата на единиците на локалната самоуправа (ЗЕЛС) и побарал да биде свикана итна седница за да се најде решение за проблемот.

„Јавно ја повикувам и Владата да размисли за вонредна ситуација поради тоа што ‘Комунална хигиена’ изминатите пет дена воопшто не се појавува на територија на Општина Центар за да го отстрани сметот. Нема да дозволиме ова да им се случува на центарци. Апелирам до Владата и ЗЕЛС да ни помогнат во овој дел да се справиме заедно со сметот со кој се соочуваме во Општина Центар“,

додава Герасимовски.