Завршил средно медицинско, а продолжил на политички науки на факултет. На прашањето зошто, Ѓорѓиевски вели затоа што отсекогаш сакал да помага, но тогаш ја сменил одлуката на каков начин би сакал да го прави тоа
Смета дека имал успешен мандат како градоначалник на Кисела Вода, дека има што да му понуди на Град Скопје и дека ќе победи уште во првиот круг
„Младиот стратег со амбиција да го воскресне градот“ – вака „Чет џипити“ го опишува кандидатот на ВМРО-ДПМНЕ за градоначалник на Скопје, Орце Ѓорѓиевски. Тој е актуелен прв човек на Општина Кисела Вода, а неговата кандидатура на почетокот на јули ја објави лично лидерот на партијата и премиер Христијан Мицкоски.
„Тој е отворен, достапен и посветен работник кој решава проблеми. Нова енергија што му е потребна на Скопје после четиригодишно девастирање и замреност на градот“,
кажа Мицкоски.
Препознатлив за соседите, Ѓорѓиевски изминатите години со семејството живее во близина на салата Расадник во Кисела Вода. Сепак, најголем дел од детството и тинејџерските години ги поминал во родната куќа во Драчево. Израснат во семејство со традиционални вредности, вели дека воспитувањето оставило трага врз неговиот карактер.
„Во однос на моето воспитување потекнувам од патријархално семејство, традиционално македонско семејство, кое што сериозно нивното воспитување и насоките од раното детство кои што ми ги давале, успеало да ме изгради во таков човек каков што сум, каков што сум денес.Јас сум после периодот од кога се оженив, овде преселен во Расадник живеам, каде што се наоѓаме во моментот, но се на се, едно убаво, хармонично детство, многу дружба, повеќе на улица. Немаше тогаш телефони и оние алатки кои што ги имаат децата денес на располагање. Безгрижно детство и многу убави спомени“,
вели Орце Ѓорѓиевски, кандидат на ВМРО-ДПМНЕ за градоначалник на Скопје.
Слободното време, вели, се труди да го помине со синот и сопругата, а барем два пати месечно и на ручек кај родителите. За спорт нема многу време – во помлади години тренирал кик-бокс, а сега повремено оди во фитнес-сала.
Во однос на образованието, има необична комбинација.
360 степени: Споменавте средно медицинско дека сте завршиле и тоа лаборант, а потоа на Факултетот за политички студии во Скопје. Што ве премисли?
Ѓорѓиевски: Па, генерално отсекогаш сакав да работам за граѓаните, за народот, иако перцепцијата во пораната младост ми беше дека тоа треба да го правам низ медицината. Претпоставувам дека сплетот на околности, мојот партиски активизам во прво време, опкружувањето со луѓето со кои што и ден денеска се дружам и се мои блиски пријатели, Тимчо Муцунски би го споменал, Владимир Нелоски, претседателот Мицкоски, многу години наназад функционираме заедно и соработуваме, влијаеше да се насочам кон ете, да завршам политички студии на универзитетот тука во, во Скопје. Сакав да влезам во пракса и да пробам да ги променам работите и мислам дека успешно тоа го правам изминативе четири години.
360 степени: Имаше еден професор на политички студии кој на студентите во прва година им велеше дека политиколог и политичар е како криминалец и криминолог. Точно ли е тоа?
Ѓорѓиевски: Видете, политички теоретски ние можеме да ги анализираме процесите, но мојата цел и крајна заложба е да видам народ, граѓани задоволни од она што треба да се реализира, а некој не го реализирал во минатото. Затоа за мене многу сериозен предизвик, претставуваше моментот да влезам во пракса, да пробаме да ги промениме работите, затоа што пак и од друга страна сметам дека доволно долги години во државата теоретски се констатирале состојбите, но никој не влегол во костец да ги решава проблемите, како што сметам дека јас тоа го правев изминативе четири години во мојата општина, но верувам дека истото со иста динамика, со исто темпо ќе го правиме и во градот Скопје наредните четири години.
Ѓорѓиевски пред да се вклучи во политика, работел во приватниот сектор. Имал бизнис поврзан со возила, потоа со градежништво, а десет години работел и во приватна компанија од областа на енергетиката. Искуството стекнато во бизнис секторот му помага во политиката, вели тој.
Не е тајна дека неговите аспирации за градоначалник на Скопје се од поодамна. Па, пресудно во одлуката тој да биде кандидатот на ВМРО-ДПМНЕ, била добрата позиција на внатрепартиските анкети.
А за неговите лични мотиви и што најмногу му пречи во Скопје, вели…
„Лошата хигиена, лично мене. На моето опкружување и моите пријатели сериозно им смета тоа што на секоја микролокација со контејнери имаме мини депонија, што не се интервенира во тој дел. Ми пречи кога ќе има дефект за водоснабдување во услови кога летниов период половина Скопје немаше вода за за пиење, а дефектите со месеци не се санираат. Тоа се загуби огромни на вода. Ми пречи кога по неколку часови во неизвесност се чека, мајка ми патува до нејзиното работно место секој ден со автобус и честопати ми го споменува тоа, но и многу мои сограѓани овде, задоцнувањето на автобусите, но и неизвесноста дали ќе дојде автобус или нема да дојде. Ми смета што пораснавме неколку генерации без луна парк сериозно. Ми смета што градскиот парк е во крајно лоша состојба. Ми смета кејот кога ќе прошетам заедно со моето семејство, состојбата во која што се наоѓа истиот“,
вели Ѓорѓиевски.
Ѓорѓиевски за себе вели дека е неконвенционален политичар. Така го објаснува и слоганот „Прво човек, потоа градоначалник“.
„Јас не сум политичар кој што процесите ги решава од канцеларија, туку кој што е постојано е присутен меѓу граѓаните, на терен сум. Честопати знам и пеш да отидам, блиску ми е општината до, до моето работно место. Знаете, некогаш не е важно само и доволно на некој да му ја направите улицата која што ја чека со години или да создадете услови во училиштето, во градинката или било кој процес да го решите, парк да направите или било каков инфраструктурен проект. Важно е понекогаш да има народот, граѓанинот на кого да се потпре. Некој со кој што ќе може нормално да разговара како со човек од своето семејство и затоа сметам дека и на скопјани им треба човек пред се на кој што ќе можат да се потпрат во наредните четири години“,
додава тој.
Проектите направени за време на градоначалничкиот мандат во Кисела Вода, Ѓорѓиевски користи шанса да ги спомене и во програмата за Скопје. Меѓу најзначајните смета дека е реновирањето на салата „Расадник“, за која нескромно вели дека е круна на неговиот мандат.
„Во Кисела Вода покажавме дека може поинаку да бидат работите, за разлика од минатото, значи транспарентно и во интерес на граѓаните. Тука сме во Расадник и најдобар пример за тоа беше меѓународниот конкурс каде што поништивме 99 маркици за градба. И во Град Скопје сметам дека треба во контекст на истото да се одвиваат работите. Земајќи во предвид дека граѓаните се тие кои треба да одлучуваат. Но и советот кој што ќе биде приклучен, составен од експерти, од луѓе од фелата кои си ја знаат работата најдобро. Не смее да ги игнорираме тие работи ако сакаме напредок“,
посочува Ѓорѓиевски.
Програмата „За нашето Скопје“ е поделена на седум столба. А главните ветувања се во делот на инфраструктурата, и јавниот превоз, хигиената и загадувањето. Ѓорѓиевски веќе најави чистење на градот во првите 72 часа ако ја добие довербата на скопјани.
Ѓорѓиевски: Паралелно ќе започнеме со процес на чистење на сите диви депонии и активни жаришта во градот, како Вардариште, Визбегово и неколку депонии во Карпош. Ова ќе биде комбиниран систем за да не дозволиме во иднина да се случуваат потпалувања. За Вардариште повеќе од 30 години е таа депонија. Јас таму мега-парк ќе направам.
360 степени: Тоа наиде на критики, затоа што тоа почвата е загадена…
Не, тоа наиде на безидејност од другата страна немање алтернатива од другата страна. Кој е мојот план? За Вардариште има физибилити студија од 2014 година. Таа вели дека со соодветен третман на земјиштето и депонијата, ние ќе се доведеме до состојба да правилно биде истретирано целото земјиште таму, одгасувајќи, водејќи грижа за водите соодветно да се истретираат. Тој талог што постои, но и соодветно третирање на почвата , вклучувајќи го и сето ѓубре. Не само таму, туку и на другите места. Најдобар третман траен е кога на исто место ќе направите паркови, според барањата на граѓаните. Во Кисела Вода имавме места кои ги претворивме во паркинзи или за каква било функционална потреба за граѓаните. Во втора фаза, депониите и подобрување на амбиеталниот воздух. Ќе работиме на проширување на градската мрежа за парно греење. Во повисоките зони каде тоа не е можно, Градот Скопје ќе субвенционира набавка на топлотни пумпи, што е економично и трајно решение за домаќинствата. Ќе имаме и големи акции за зазеленување и пошумување на Скопје, како и сет на други мерки.
360 степени: Во однос на јавниот превоз најавувате набавка на нови автобуси секоја година, градски воз и БРТ. Тоа е истиот оној проект што го најавуваше Шилегов или станува збор за нешто поразлично?
За тој проект има веќе обезбедено средства, градот е задолжен и се плаќаат камати. Нелогично е јас да го игнорирам, без разлика од кого и кога започнал. Според мене, треба да биде додадена линија којашто ќе води до Радишани од едната страна, а од другата страна да има линија којашто ќе води кон Драчево. Она што брзо ќе биде интервенирано од моја страна е издавањето на 60-тина лиценци за приватните превозници, кои чекаат со месеци, ако не и година дена, за да бидат ставени во функција за граѓаните. Тоа сериозно ќе влијае на надминување на проблемот во ЈСП во прва фаза. Исто така, тука се и 80-те дополнителни автобуси кои со набавка од Владата треба да стигнат во градот. Покрај сето тоа, јас повторно на годишно ниво ќе го обновувам возниот парк на ЈСП, за никогаш да не се доведеме во состојба на целосен колапс.
360 степени: Има една теорија дека ВМРО-ДПМНЕ намерно го блокира градот, за кога вие би дошле на власт, скопјани да ве доживеат на некој начин како спасителза Скопје, во делот на ѓубрето, депониите итн.
Ѓорѓиевски: Тоа е премногу несериозна теорија од нашите политички опоненти. Треба да се земе предвид кој раководи со градот во моментов. Директорите на јавните претпријатија се од Левица, СДСМ, ДУИ. Во моментов нема директор кој доаѓа од редовите на ВМРО-ДПМНЕ. Мислите дека јас би си дозволил да гледам вакви контејнери да ги видите овде неиспразнети? Нашите општински служби, наместо да работат на она што е нивна надлежност, го собираат отпадот околу контејнерите, што е надлежност на Градот Скопје. Ние трошиме наши ресурси за да ги амортизираме негативните состојби што ги предизвикува градот.
Ѓорѓиевски е убеден дека како и на локалните избори во 2021 година така и сега ќе успее да го освои градоначалничкиот мандат уште во првиот круг од локалните избори. Но, ако сепак има втор круг, на гласачкото ливче како противкандидат очекува да се најде Каја Шукова од СДСМ.
