Новиот систем,предвидува граѓаните кои доаѓаат од земји надвор од ЕУ или Шенген-зоната да остават биометриски податоци (отпечаток од прст и фотографија) при првиот влез во некоја од членките на Европската Унија
По повод денешниот старт на имплементацијата на новиот систем, данскиот министер за имиграција и интеграција Расмус Стоукланд, чија земја е актуелен претседавач со Советот на ЕУ, изјави дека неговото воведување е со цел зајакнување на надворешните граници на Шенген зоната
Од денеска (12 октомври) стапува во сила новиот дигитален Систем за влез и излез (ЕЕС) на граничните премини на надворешните граници на 29 земји членки на Шегнен зоната.
Новите правила ќе се имплементираат постепно, а процесот, како што претходно беше најавено, целосно треба да заврши до април наредната година.
Со стапувањето во сила на новиот Систем за влез и излез, земјите членки на Шенген зоната ќе започнат со електронско регистирање на податоците на државјаните на трети земји, што не се дел од Европската Унија, меѓу кои и на македонските граѓани, кога ги преминуваат надворешните граници на 29-те земји за престои до 90 дена.
За време на периодот на постепено воведување на ЕЕС, земјите членки на Шенген зоната можат самостојно да одлучат на кои гранични премини ќе го имплементираат системот и кога. Целта на ваквиот пристап е да им се овозможи на граничните власти, транспортната индустрија и патниците да се прилагодат на новите процедури.
По истекот на шесте месеци, односно од 10 април 2026, ЕЕС системот ќе треба да се применува на сите гранични премини, а процедурата на ставање печати во пасошите ќе биде заменета со електронски записи во системот.
Новиот систем,предвидува граѓаните кои доаѓаат од земји надвор од ЕУ или Шенген-зоната да остават биометриски податоци (отпечаток од прст и фотографија) при првиот влез во некоја од членките на Европската Унија.
„При првото патување по воведувањето на системот, патниците ќе поминат низ целосен процес на регистрација кој вклучува фотографирање, скенирање на отпечатоци од прсти и внесување податоци од пасошот. За да се олесни процедурата, на граничните премини ќе има и пунктови за самопослужување, а можно е и претходно предрегистрирање преку мобилни апликации. При следните патувања, контролата ќе биде значително побрза бидејќи податоците веќе ќе бидат складирани во системот и ќе се врши само нивна проверка“, соопштија од Министерството за внатрешни работи (МВР) на земјава на 1 октомври, објаснувајќи ги деталите за новиот систем.
Со ЕЕС се очекува да се обезбедат веродостојни податоци за граничните власти, што ќе им овозможи систематски да откриваат лица кои го пречекоруваат дозволениот период за престој, како и случаи на измама со патни документи и идентитет.
Според Европската комисија (ЕК), со целосното автоматизирање на гранични проверки ќе се обезбеди полесно и побезбедно минување на границите за сите.
Новиот систем ги исполнува највисоките стандарди за заштита на податоците и приватноста, осигурувајќи дека личните податоци на патниците ќе бидат заштитени и безбедни.
Во пресрет на почетокот на имплементацијата на ЕЕС системот, македонското Министерството за внатрешни работи им препорача на сите наши граѓани кои од денеска планираат да патуваат во земја од Шенген зоната да се запознаат со новите правила и процедури, со цел да се осигурат дека нивните патувања ќе бидат навремени, безбедни и без непотребни одлагања.
По повод денешниот старт на имплементацијата на новиот систем, данскиот министер за имиграција и интеграција Расмус Стоукланд изјави дека неговото воведување е со цел зајакнување на надворешните граници на Шенген зоната.
„Мораме да направиме сè што можеме за да спречиме терористите и нерегуларните мигранти илегално да влегуваат во Шенген зоната. Од клучно значење е да одржуваме ефикасна контрола врз државјаните на трети земји што влегуваат во Шенген зоната, за да можеме да ја зајакнеме безбедноста на надворешните граници. Со ЕЕС системот ќе стане полесно да се следи кој ги преминува нашите граници“,
порача Стоклунд, чија земја е актуелен претседавач со Советот на Европската Унија (ЕУ).