ВЛЕН ја обвинија ДУИ дека ги злоупотребува дури и проблемите на сопствените партиски членови, како случајот со Зекирија Шаини, кој е носител на советничката листа на коалицијата предводена од ДУИ во Општина Липково
Владејачката коалиција ВЛЕН го оцени како особено загрижувачки обидот на ДУИ да му даде политичка димензија на случајот со докторот Зекирија Шаини, кој пред два дена беше ранет во пукање во Куманово. Дополнително ја обвинија опозициската партија оти манипулира со семеен конфликт среде изборна кампања, поттикнувајќи тензии.
„ДУИ доживеа тежок пораз, бидејќи не ѝ успеа обидот да ја искористи ситуацијата за сопствена политичка корист. Тие беа демантирани и од самиот нивен активист, Зеќирија Шаини, кој јавно изјави дека нема политичко непријателство со никого, со што паднаа во вода сите тврдења за наводен ‘политички атентат’. Наместо да придонесе за смирување на ситуацијата, партијата повторно приредува политички театар, обидувајќи се, како и секогаш, да создаде перцепција дека ‘некој работи против нив’“,
велат од владејачката коалиција.
Ја обвинија ДУИ дека ги злоупотребува дури и проблемите на сопствените партиски членови, како случајот со Шаини, кој, инаку, е носител на советничката листа на коалицијата предводена од ДУИ во Општина Липково.
Откако беше пуштен од болница, во својата прва реакција по вооружениот напад, доктор Зекирија Шаини вчера повика случајот да не се политизира и да не се поврзува со никакви политички судири бидејќи, како што вели, нема непријателство со никого.
Претходно вчера, МВР информира дека во врска со вооружениот инцидент е приведена и сопругата на Шаини поради основи на сомнение дека е поврзана со обидот за убиство на нејзиниот сопруг.