Ова е второ гласање за недоверба на Еврокомисијата за помалку од три месеци, откако во јули европратениците ја отфрлија сличната иницијатива на романскиот десничарски европратеник Георге Пипереа
Членовите на Европскиот парламент денеска, на последниот ден од овонеделната пленарна сесија во Стразбур, во одвоени гласања, ќе се изјаснат по двете инцијативи за изгласување недоверба на Европската комисија на Урсула фон дер Лајен.
Гласањето следи откако во понеделникот европратениците одржаа дебата по иницијативите за недоверба предложени од десничарската група Патриоти за Европа (ПФЕ) и од екстремнолевичарската Левица.
Образложувајќи ја иницијативата на својата група, претседателот на ПФЕ, Жордан Бардела, порача дека гласањето против Европската комисија нема да ја уништи Европа, туку ќе ја спаси.
Тој оцени дека под водство на Фон дер Лајен, Европската Унија се движи брзоплето и безглаво без да знае каде оди, а дополнително Еврокомисијата продолжува со политиката на „смешното проширување на ЕУ“.
Бардела обвини и дека со склучувањето на договорите за трговија со МЕРКОСУР и САД, Еврокомисијата потпишала трговско предавство на Европа, а дека со нејзините илјадници нови законски акти ја направила ЕУ светски шампион во бирократијата.
Копретседателката на Левицата, Манон Обри, пак, образложувајќи ја иницијативата на нејзината група истакна деkа Фон дер Лајен мора да замине од функцијата затоа што капитулирала пред американскиот претседател Доналд Трамп, поддржувајќи го неговиот неокoлонијален план за Газа и ја довела Унијата во вазална позиција правејќи економски отстапки во корист на САД.
Обри нагласи дека Фон дер Лајен мора да замине и затоа што е соучесник во геноцидот во Газа со тоа што не презема ништо додека десетици илјади цивили и деца се оставени да гинат под ударите на израелските бомби.
„Вие одбивате да ги прекинете трговските односи со Израел и да воведете ембарго за оружје, во време кога го разгледуваме 19. пакет санкции кон Русија“,
рече Обри.
Таа ја обвини Фон дер Лајен и за соработка со десничарите и екстремните десничари, кои, како што рече, насекаде шират омраза, го криминализираат абортусот, дејствуваат против припадниците на ЛГБТ-заедницата и му забодуваат нож во грб на владеењето на правото.
Одговарајќи на наводите изнесени во образложенијата на иницијативите, Фон дер Лајен обвини дека противниците на ЕУ се трудат да поттикнат поделби и да ги искористат тие поделби против самата Унија.
Според неа, токму рускиот претседател Владимир Путин не ја крие својата радост и поддршка за она што за него го работат сите негови послушни пријатели во Европа.
„Тоа е најстариот трик – сеење поделби, ширење дезинформации, правење жртвено јагне. Сето тоа, за да ги сврти Европејците едни против други. Да го спуштиме нашиот гард додека се бориме едни против други. Да ја ослабнеме нашата решителност и нашата отпорност. Тоа е стапица и едноставно не можеме да паднеме на неа“,
нагласи Фон дер Лајен.
Таа истакна дека во време на максимална неизвесност и експлозивна нестабилност, на ЕУ ѝ е потребно единство за да ја зајакне својата безбедност, да ја заштити демократија, да ја поддржи индустрија и да го зацврстиме својот општествен модел.
За да бидат прифатени, иницијативите треба да добијат поддршка од најмалку две третини од пратениците што ќе учествуваат во гласањето, при што бројот на оние што гласале „за“ треба да е поголем од половина од вкупниот број европратеници или во моментов најмалку 360 гласа.
Ова е второ гласање за недоверба на Еврокомисијата за помалку од три месеци, откако во јули европратениците ја отфрлија сличната иницијатива на романскиот десничарски европратеник Георге Пипереа.
За предлогот на Пипера во јули се изјаснија 175 европратеници, 360 гласаа против, а 177 беа воздржани, но проценките се дека сега бројот на членовите на ЕП кои ќе се изјаснат за недоверба на Еврокомисијата ќе биде значително поголем. Се проценува дека во идеално сценарио некоја од иницијативите за недоверба би можела да добие поддршка од најмногу 305 пратеници, што сепак не би било доволно за нејзино усвојување.