Според Атанасовска, оваа прва пресуда поставува темел за сите останати 799 постапки кои следуваат. Таа посочи дека СКРМ навремено предупредувал дека решенијата се неправно изготвени, но Министерството останало „глуво“
Синдикатот на културата на Република Македонија (СКРМ) објави дека ја добиле првата судска победа во серијата од 800 тужби поднесени за заштита на правата на вработените во културата. Судот, како што велат од СКРМ, ја усвоил првата тужба, потврдувајќи дека правата на културните работници биле повредени со незаконски донесените решенија за плати.
На прес-конференција пред Министерството за култура и туризам, претседателката на СКРМ, Вера Атанасовска, истакна дека оваа пресуда е доказ дека борбата за достоинство е правно издржана, оправдана и заслужена.
„Со оваа пресуда судот потврди дека правата на културните работници биле повредени со незаконски донесените решенија за плати и дека законитата основа мора да се почитува“,
изјави Атанасовска.
Според Атанасовска, оваа прва пресуда поставува темел за сите останати 799 постапки кои следуваат. Таа посочи оти СКРМ навремено предупредувал дека решенијата се неправно изготвени, но Министерството останало „глуво“.
Синдикатот го обвини Министерството за култура дека, и покрај судската одлука, продолжува да носи незаконски решенија со номинални износи наместо законска формула, чие кроење го прават истите службеници и во минатата и во сегашната власт.
Атанасовска потсети дека добиле официјален одговор од Министерството за финансии дека пресметките на платите во културата се изготвуваат исклучиво во Министерството за култура, додека Финансии само ги одобрува фискалните планови. Синдикатот не добил одговор од Министерството за култура за тоа како се дошло до, како што ја нарече, „фамозната формула за ускратување на платите“.
Претседателката на СКРМ упати повик за разум и договор, повикувајќи го Министерството „да седне на маса“ за да се реши спорот.
„На тој начин институциите нема да плаќаат огромни судски трошоци, а министерот конечно ќе застане зад своите вработени. Доколку тоа не се случи, СКРМ ја продолжува правната битка, но на крајот ќе бара одговорност за оштетениот буџет кој настанал само и заради нечиј каприц“,
додаде Атанасовска.