Зеленски ја обвини Русија дека се обидува да ја дестабилизира Европа со користење дронови

Украинските претседател не сподели повеќе детали во врска со ова прашање, но упати порака до Москва дека нејзините, како што ги нарече, деструктивни дејствија нема да поминат без одговор

Украинскиот претседател Володимир Зеленски ја обвини Москва дека се обидува да ја дестабилизира Европа со користење беспилотни летала за саботажи и создавање немири, пренесуваат светските медиуми.

Зеленски ова го кажа во своето обраќање синоќа, наведувајќи дека Русија ја користи својата т.н. „флота во сенка“ не само за финансирање на војната преку транспорт на нафта со танкери, туку и за саботажи и разни други активности чија цел е поткопување на стабилноста низ целиот континент.

„Неодамнешните лансирања на беспилотни летала од танкери се еден таков пример“,

рече тој, повикувајќи се на информации на украинските разузнавачки служби.

Зеленски: Украина е подготвена да ѝ помогне на Европа во справувањето со дроновите 

Инаку, наводите на украинскиот претседател се во врска со неодамнешните инциденти со беспилотни летала кои беа забележани над аеродромите во неколку европски градови и предизвикаа прекини на авиосообраќајот.

Засега нема официјални информации за потеклото на беспилотните летала што беа забележани над аеродромите во главните градови на Данска, Норвешка, како и над аеродромот во германскиот град Минхен.

Аеродромот во Осло привремено ги прекина летовите поради забележани дронови

Викендот и воздушниот сообраќај на меѓународниот аеродром во Вилнус беше привремено прекинат откако во литванскиот воздушен простор беа забележани сомнителни балони. Инцидентот доведе до пренасочување на неколку летови.

Затворен за сообраќај аеродромот во Вилнус поради сомнителни балони во воздушниот простор

Во меѓувреме, заменик-шефот на Советот за национална безбедност на Русија, Дмитриј Медведев, излезе со тврдења кои сугерираат дека украинските сили самите би можеле провокативно да користат вакви беспилотни летала за да ја вовлечат Европа во војна против Русија.

Инаку, Украина, исто така, произведува беспилотни летала со долг дострел.

„Ги споделуваме информациите што ги имаме со нашите партнери и клучно е тие да преземат опипливи чекори како одговор на Русија“,

рече Зеленски, додавајќи дека ќе има понатамошни состаноци и преговори, и јавни и зад затворени врати.

Украинскиот претседател не сподели повеќе детали во врска со ова прашање, но упати порака до Москва дека нејзините, како што ги нарече, деструктивни дејствија нема да поминат без одговор.

„Русите мора да знаат дека ниту едно од нивните деструктивни дејствија, сите одвратни работи што ги прават, нема да помине без одговор од светот“,

изјави Зеленски.