ДЗС објави и дека индексот на цените на мало во септември годинава во однос на август бележи пад од 0,7 отсто, а на годишно ниво индексот на цените на мало бележи раст од 4,1 проценти
Трошоците за животот во септември годинава, во однос на септември лани, бележат зголемување од 4 отсто, а цените на мало од 4,1 отсто.
Според податоците на Државниот завод за статистика (ДЗС), трошоците за животот во септември 2025 година, во споредба со претходниот месец, се намалиле за 0,2 отсто, а цените на мало за 0,7 отсто.
Најголемо зголемување на трошоците за живот во септември, во однос на претходниот месец, имало кај алкохолните пијалаци и тутунот кои поскапиле за 2,8 отсто. За 1,8 отсто поскапо се плаќало за комуникации, а мебелот, покуќнината и одржувањето на домаќинствата биле поскапи за 0,8 отсто. Во септември, во однос на август, граѓаните плаќале поскапи и вода, гас, електрика и други горива и тоа за 0,3 отсто.
Намалувањето на трошоците за животот во септември е најмногу поттикнато од падот на цените во секторот транспорт, каде што трошоците се намалиле за 3,3 отсто.
По него следуваат намалувањата кај рестораните и хотелите каде што има пад од 1,3 отсто, за рекреација и култура се плаќало поевтино за 0,7 проценти, а облеката и обувките биле со цени пониски за 0,3отсто.
Во септември, кај храната и безалкохолните пијалаци бил забележан минимален пад од 0,1 проценти.
Трошоците на животот во групата образование останале на исто ниво како и во претходниот месец.
ДЗС објави и дека индексот на цените на мало во септември годинава во однос на август бележи пад од 0,7 отсто, а на годишно ниво индексот на цените на мало бележи раст од 4,1 проценти.
На годишно ниво, според извештајот на ДЗС, зголемување на трошоците во овој септември има во сите категории. Најголемо е зголемувањето кај индустриско-прехранбените производи и тоа за 5,3 отсто. Прехранбените производи поскапиле за 4 проценти, а непрехранбените индустриски производи и тутунот за 3,8 отсто.
Алкохолните и безалкохолните пијалаци поскапиле за 2,9 проценти, а земјоделските производи за 0,6 отсто.