Ѓорѓиевски вели дека визијата за зелено Скопје не застанува само на Лепенец и најавува дека во плановите се вклучени низа капитални парковски проекти низ целиот град
Кандидатот за градоначалник на Скопје од ВМРО-ДПМНЕ, Орце Ѓорѓиевски, претстави проектот за изградба на мегапарк покрај Лепенец кој ќе се простира на територијата на Општина Карпош и ќе поврзува повеќе скопски општини.
Мегапаркот ќе се протега по течението на реката Лепенец, на потегот меѓу Бардовци и Даме Груев, и ќе опфати површина од над 300 илјади квадратни метри.
„Овој простор со години беше запоставен, а сега ќе стане симбол на еколошка обнова и современо градско живеење. Ќе создадеме нова урбана оаза за рекреација, спорт и семејни активности“,
рече Ѓорѓиевски на денешната прес-конференцијата.
Паралелно со изградбата на паркот, се предвидува воспоставување зелени коридори по целата должина на реката, со пешачки и велосипедски патеки кои ќе ги поврзуваат населбите, парковите и јавните институции. Ова треба Лепенец да го претвори во симбол на урбана поврзаност и чиста животна средина.
Ѓорѓиевски вели дека визијата за зелено Скопје не застанува само на Лепенец.
Во плановите, тој вели дека се вклучени низа капитални парковски проекти низ целиот град.
Тој најавува дека изградба на мегапаркови на местото на дивата депонија Вардариште и вдолж булеварот „Христијан Тодоровски Карпош“, градска шума во Расадник во Кисела Вода, како и реализација на проектот „Скопски зелен архипелаг,“ кој предвидува 50 нови маалски паркови низ сите делови на градот.
„Дополнително, ќе извршиме целосна обнова на Градскиот парк во Скопје и Паркот на природата Гази Баба, со што двата најголеми еколошки симболи на градот ќе добијат нов живот и современ изглед“,
рече Ѓорѓиевски.
Како темел на функционален град, Ѓорѓиевски рече дека е патната инфраструктура и најави доизградба на булевар „Љубљанска“ и поврзување со Бардовци.
Според Ѓорѓиевски, со комплетирањето на делот од завршениот мост до улицата „Скупи“, ќе се воспостави клучна врска меѓу северниот и западниот дел на Скопје.
Смета дека е потребна забрзана доизградба на клучката „Момин поток“ за да се деблокира една од најоптоварените сообраќајни крстосници во градот.
Ѓорѓиевски вели дека доколку стане градоначалник, приоритет ќе биде реконструкцијата на улицата „Загрепска“, која е од витално значење за функционирањето на Детската болница „Козле“ и за пристап на возилата на Итната медицинска помош.