Азири обвини за „скандалозни злоупотреби со јавни пари“ во „Комунална хигиена“ и додаде дека тоа претпријатие е водено од директор на ДУИ
Градот Скопје и Општина Чаир се соочуваат со последиците од партискиот коруптивен и лош менаџмент на директорот на „Комунална хигиена“, Сабахудин Рустеми, вели портпаролот на локалниоt изборен штаб на ВЛЕН во Чаир, Сабри Азири.
Азири обвини за „скандалозни злоупотреби со јавни пари“ во „Комунална хигиена“ и додаде дека тоа претпријатие е водено од директор поставен од ДУИ.
Азири рече дека вчера презентирале, како што ги нарече, „шокантните факти“ дека раководството на „Комунална хигиена“ потрошило над 1,4 милиони евра јавни пари за „сервиси“ на возниот парк.
„Резултатот е катастрофален, расипани возила и Скопје задушено во отпад“,
истакна Азири.
Според него, со истата сума пари, можело да се набави сосема нов, модерен возен парк за собирање отпад.
Тој рече дека со тие 1,4 милиони евра можеле да се купат 26-27 нови комунални возила од типот „пиаџио портер“ (Piaggio Porter) за отпад, или до 40 нови средни камиони за собирање ѓубре, или над 80-90 мали комерцијални возила прилагодени за помали маала.
„Со тие пари, Скопје, Чаир и сите општини ќе имаа целосен парк на современи возила, а граѓаните ќе живееја во чиста средина“,
нагласи портпаролот на ВЛЕН.
Азири посочи дека зад целиот овој скандал стои молкот и соодговорноста на кандидатот на ДУИ за Општина Чаир, Бујар Османи.
„Бујар Османи никогаш не се осмели да го повика на одговорност својот пријател, директорот на претпријатието. За него, не е важна чистотата на Чаир, туку заштитата на личниот политички углед и неговите партиските кадри“,
изјави Азири.
Тој нагласи дека Османи не е близок со граѓаните на Чаир и дека повеќе од 10 години ги користел нивните гласови само како „трамполина за централната власт“, додека проблемите на граѓаните ги оставал настрана.
На крајот, Азири ги повика граѓаните на Чаир на 19 октомври „еднаш засекогаш да ја отстранат ДУИ и нејзините функционери од политичката сцена“.