И после овој мој апел, повторно ќе слушнеме демант на Јавното претпријатие дека навремено си ги завршуваат своите обврски, го собираат сметот од улиците, рече градоначалникот на Центар во видеообраќање на Фејсбук
Градоначалникот на Општина Центар, Горан Герасимовски, го обвини Јавното претпријатие „Комунална хигиена“ оти не ја врши работата за која е плаќано од граѓаните. Во видеообраќње на Фејсбук од пред преполнетите контејнери во општината чиј градоначалник е, Герасимовски рече дека хигиеничарите од ПОЦ повторно ја вршат работата на скопското комунално претпријатие, како во изминатите неколку години.
„Како изминативе неколку години, така и денеска, ова понеделничко утро, центарци се будат во ѓубре. Целата општина е полна со смет, нашите хигиеничари се постојано на терен, го сработуваат сето она што ‘Комунална хигиена’ не го сработува изминативе години. И после овој мој апел, повторно ќе слушнеме демант на Јавното претпријатие дека навремено си ги завршуваат своите обврски, го собираат сметот од улиците“,
рече градоначалникот на Центар во видеообраќањето.
Герасимовски најави и дека општината ќе купи дополнителна опрема за чистење на улиците.
„Во наредниот период се купуваат нови две цистерни за да се мијат улиците, но и нови метларки и камион кој ќе ни треба, бидејќи очигледно ‘Комунална хигиена’ не си ја врши работата. Верувам дека после толку апели ќе се свестат и овој смет нема повеќе да го има на улиците на Центар“,
додаде тој.
Герасимовски во повеќе наврати досега ја обвинува „Комунална хигиена“ поради несобирањето отпад од скопски Центар, а во јуни годинава најави и дека ќе поднесе кривична пријава за претпријатието поради оваа причина.