Секој ден ни испраќаат емисари за ние да влеземе во Влада по изборите во октомври. Директно, од ВМРО- ДПМНЕ. Затоа што ги гледаат резултатите. Резултатите се три спрема еден, рече Османи
Измислици и сценарија се изјавите на кандидатот за градоначалник на Чаир, Бујар Османи дека ВМРО-ДПМНЕ испраќа „емисари“ кај ДУИ со предлог за влез во Владата по изборите, реагираат од ВМРО-ДПМНЕ. Во реакцијата, како што наведуваат од владејчката партија, Османи се обидува да ја прикрие паниката во која се наоѓаат ДУИ и СДСМ стравувајќи од пораз на локалните избори.
„Ситните трикови на грофот од Зајас не минуваат ниту во детска градинка. ВМРО-ДПМНЕ јасно и гласно порачува: единствените „емисари“ што ги праќаме се оние кои ја носат пораката на народот, а тоа е одговорност за криминалниот картел ДУИ – СДС. Одговорност за Али, Заев, Филипче, Груби и Османи. Токму на локалните избори овие две структури конечно и формално ќе завршат таму каде што одамна им е местото, на буништето на историјата“,
порачаа од ВМРО-ДПМНЕ.
Од ВМРО-ДПМНЕ додаваат дека изборите во октомври ќе бидат„пресуда“ за криминалите на ДУИ и СДСМ.
„Бујар Османи денес е ништо друго освен последниот портпарол на криминалниот картел кој граѓаните го препознаа. Но, неговата одбрана е залудна. Нема повеќе политичко мешетарење, нема пазари зад грбот на народот. Во октомври ќе има јасна пресуда, пресуда на граѓаните кои ќе ги испратат картелот на СДС и ДУИ во политичка пензија, а правдата ќе биде задоволена. Зашто таа има име и презиме, а одговорноста мора да се испорача“,
велат од ВМРО-ДПМНЕ.
Османи вчера на собир во Чаир рече дека изјавите на власта дека нема да има предвремени парламентарни избори се знак на паника и страв од пораз. Тој кажа и дека ВМРО-ДПМНЕ испраќа „емисари“ кај ДУИ со предлог за влез во Владата по локалните избори.
„Секој ден ни испраќаат емисари за ние да влеземе во влада по изборите во октомври. Директно, од ВМРО- ДПМНЕ. Затоа што ги гледаат резултатите. Резултатите се три спрема еден,“
рече Османи.
Според него, такво сценарио е неприфатливо за ДУИ, бидејќи одлуката треба да ја донесат граѓаните.
„Ние не сме народ што можат да го потценуваат, излези ти, влези ти. Нема поголемо понижување од премиерот да ти ги одредува претставниците. Не можете повеќе да не подредувате. Може да седнете со нас, со победникот. Не со нас како такви, туку со победникот. Со оној што има еден глас повеќе од албанскиот народ. Ние не прифаќаме да не земате и да не давате, тоа може со тие други, кои тивко прифатиле статус на вазали,“
рече Османи.