Судијата рече дека Трамп го прекршил федералното процедурално правило, кое бара кратко и јасно наведување на причините за барање правна заштита, додавајќи дека тужбата не е јавен форум за навреди или платформа за изразување гнев кон противниците
Федералниот суд на Соединетите Американски Држави (САД) ја отфрли тужбата за клевета од 15 милијарди долари на американскиот претседател Доналд Трамп поднесена против весникот „Њујорк тајмс“.
Американскиот окружен судија Стивен Меридеј ја отфрли тужбата за клевета на Трамп против весникот, велејќи дека нејзината содржина е долга со непотребни коментари.
Судијата рече дека Трамп го прекршил федералното процедурално правило, кое бара кратко и јасно наведување на причините за барање правна заштита, додавајќи дека тужбата не е јавен форум за навреди или платформа за изразување гнев кон противниците.
Му даде на Трамп рок од 28 дена да ја доработи и да поднесе изменета тужба.
„Тужбите мора да бидат напишани прецизно и директно. Во сегашната форма тужбата е напишана на 85 страни“,
додаде судијата.
Трамп поднесе тужба против „Њујорк тајмс“ поради неточно известување за него, односно, како што наведе, децениските лаги против него, неговото семејство и бизнис-движењето „Америка на прво место“, МАГА и американската нација како целина.
„Денес имам голема чест да поднесам тужба од 15 милијарди долари за клевета и навреда против ‘Њујорк тајмс’“,
рече Трамп.
Трамп во тужбата наведува дека весникот станал виртуелен гласноговорник на радикалната левичарска демократска партија.
„Њујорк тајмс“, коментирајќи ја тужбата, рече дека таа нема основа, односно нема никакви легитимни правни барања и дека е обид да се задуши и обесхрабри независното известување.
Пред неколку дена Трамп рече и дека телевизиските мрежи што известуваат негативно за него би можеле да ги изгубат лиценците за емитување.
Со тоа, тој ја поддржа одлуката на американската радиодифузна регулаторна комисија за суспензијата на водителот на Еј-би-си њуз, Џими Кимел, поради неговите коментари за убиството на политичкиот активист Чарли Кирк.