„Секојпат кога ќе се случи трагедија или проблем, државните функционери наместо да понудат решение, посегаат по најлесниот пат, ги обвинуваат ДУИ и Албанците. Тоа е сценарио однапред испланирано“, посочи Османи
Кандидатот за градоначалник на Чаир, Бујар Османи, денеска на прес-конференција, остро реагираше на „неодговорните и неетички напади“ врз ДУИ и Албанците, посочувајќи дека власта свесно измислува виновници за да ја прикрие својата неспособност.
„Секојпат кога ќе се случи трагедија или проблем, државните функционери, наместо да понудат решение, посегаат по најлесниот пат, ги обвинуваат ДУИ и Албанците. Тоа е сценарио однапред испланирано“,
изјави Османи.
Тој посочи дека ваквите обвинувања не само што се лаги, туку претставуваат и кривична одговорност.
„Кривичниот законик е јасен: секој кој користи лажни вести и пропаганда за да предизвика паника, омраза и нарушување на меѓуетничките односи ќе биде казнет. Овде има елементи за кривична тужба против сите оние кои ја злоупотребуваат довербата на граѓаните“,
потенцира Османи.
Тој најави дека случајот ќе биде пријавен и пред меѓународната заедница.
„Ќе ги информираме Брисел, ОБСЕ и Соединетите Американски Држави затоа што тука се прекршуваат две клучни конвенции: Конвенцијата за заштита на етничките заедници и Европската конвенција која забранува пропаганда што поттикнува омраза. Владата не само што ги крши домашните закони, туку ги гази и меѓународните норми“,
рече Османи.