Шукова: Кој ќе сноси одговорност за труењето на граѓаните?

„Отпадите и депониите работат без соодветни стандарди за заштита на животната средина и без контрола. ВМРО-ДПМНЕ и нивните градоначалници им должат одговори на граѓаните и тоа веднаш! Жителите на Скопје имаат право на здрав живот и чист воздух, а не на постојани пожари, чад и труење“, вели Шукова

Потпретседателката на опозицискиот СДСМ и кандидатка за градоначалничка на Скопје, Каја Шукова, во објава на Фејсбук напиша: „Скопје повторно под црн чад!“, откако денеска попладне избувна пожар во фабрика за електронски отпад во скопско Трубарево.

Шукова напиша дека граѓаните повторно вдишуваат отров наместо чист воздух и праша кој ќе сноси одговорност за труењето на граѓаните.

„Наместо молк, граѓаните бараат одговори и одговорност. Четири години под раководство на ВМРО-ДПМНЕ во општините сѐ е импровизација. Отпадите и депониите работат без соодветни стандарди за заштита на животната средина и без контрола. ВМРО-ДПМНЕ и нивните градоначалници им должат одговори на граѓаните и тоа веднаш! Жителите на Скопје имаат право на здрав живот и чист воздух, а не на постојани пожари, чад и труење. Доста е со импровизации и молк. Време е за реални решенија и вистинска грижа за граѓаните“,

вели Шукова.

Инаку, денеска околу 13:30 часот избувна пожар во фабриката „Ф-групација“ во скопско Трубарево, на територија на Општина Гази Баба. Пожарот произведе голем црн облак од чад видлив од цело Скопје и околината. Надлежните информираа дека се користат сите расположливи средства за справување со огнот.

Пожарот во Трубарево избувнал во објект наменет за складирање отпадни електрични материјали, потоа се проширил на неколку околни објекти – информира ЦУК

Пожарот предизвика и политички тензии. Лидерот на опозицискиот СДСМ, Венко Филипче, изјави дека Македонија веќе е опасно место за живеење. Тој повика институциите итно да излезат со точни податоци дали и колку е загаден воздухот во и околу Трубарево, како и со препораки како да се однесуваат граѓаните.

Филипче повика институциите итно да излезат со податоци и препораки за граѓаните по пожарот во Трубарево

Од владејачката ВМРО-ДПМНЕ, пак, обвинија дека опозициските партии СДСМ и ДУИ се одговорни за палење на депониите во Скопје повикувајќи ги надлежните институции да спроведат темелна истрага за инволвираноста на двете партии во намерно палење депонии.

Злосторничкото здружение ДУИ–СДС подметнува чад и отров палејќи ги скопските депонии, обвини ВМРО-ДПМНЕ