Официјално денеска е и формализирана коалицијата „Твоја Македонија“, составена од 25 партии, што заеднички ќе настапи на претстојните локални избори
Очекувам кампања во која ќе изобилуваат шпекулации, конструкции, подметнувања, невистини од страна на опозицијата и нејзините малкумина поддржувачи, рече на денешната прес-конференција премиерот Христијан Мицкоски пред седиштето на неговата партија, на која ја промовираше изборната коалиција за претстојните локални избори, а одговарајќи на новинарско прашање за тоа каква кампања очекува од партиите во следниот период.
„Ние, како коалиција, имаме со што да излеземе пред граѓаните, што сме направиле изминатите четири години во општините и што сме направиле во изминатите 15 години откако сме централна власт и ќе се обидеме да направиме разлика меѓу оние седум години, кога ДУИ и СДСМ беа во Владата, и овие четири години, кога оваа коалиција управуваше со најголемиот дел од општините и овие коалиција која управува сега со Владата во Македонија“,
кажа тој.
Мицкоски рече и дека денеска е формализирана коалицијата „Твоја Македонија“ која заеднички ќе настапи на претстојните локални избори.
Посочи дека оваа коалиција предводена од ВМРО-ДПМНЕ е убедливо најголемата, составена од 25 партии, додавајќи дека тие во голема мера го претставуваат колоритот во македонското општество, различни структури и припадности, што само потврдува дека се обединуваат околу заедничка платформа.
Лидерите на политичките партии од коалицијата „Твоја Македонија“ усвоија и „Декларација за Македонија на граѓаните и општини што создаваат иднина“.
Во следниот период додаде дека ВМРО-ДПМНЕ и коалициските партнери ќе ги презентираат резултатите и сè што имаат сработено градоначалниците во изминатите четири години.