Ограничувањата нема да влијаат на патничкиот сообраќај, а ослободувањето од мерката ќе важи и за воени летови и одредени специјални летови со посебни ознаки
Полска воведе ограничувања на воздушниот сообраќај вдолж источните граници со Белорусија и Украина еден ден откако неколку руски беспилотни летала влегоа во нејзиниот воздушен простор. Ограничувањата стапија во сила на полноќ и ќе важат до 9 декември, соопшти Оперативната команда на вооружените сили на Полска.
Ограничувањата нема да влијаат на патничкиот сообраќај, а ослободувањето од мерката ќе важи и за воени летови и одредени специјални летови со посебни ознаки.
„На барање на Оперативната команда на вооружените сили, ограничувањата за воздушниот сообраќај ќе бидат воведени во источниот дел на Полска. Овие ограничувања не важат за патничкото воздухопловство“,
соопшти полската агенција за управување со воздушниот сообраќај.
Полска вчера собори неколку руски беспилотни летала кои навлегоа во нејзината воздушна територија за време на еден од руските воздушни напади на Украина.
Високата претставничка на ЕУ за надворешни работи и безбедносна политика, Каја Калас, го опиша чинот како агресивен и дел од сериозната ескалација од страна на Русија, што, како што рече, претставува закана за безбедноста на граѓаните на ЕУ, регионалната стабилност и меѓународниот мир.