Од СДСМ потсетуваат дека ова не е изолиран случај и дека сличен имаше во јуни годинава кога директорот на Инспекторатот за употреба на јазиците, Арсим Идризи, одби да одговори на новинарски прашања на македонски јазик. Мицкоски тогаш најави дека ќе го разреши Идризи ако уште еднаш одбие да се обрати на македонски јазик
Дали премиерот ќе го разреши вицепремиерот за добро владеење Арбен Фетаи – прашуваат денеска од опозицискиот СДСМ откако тој вчера одби да одговори на македонски јазик на новинарските прашања што му беа поставени по настанот за промоција на новите регистарски таблички за службените возила.
„Владата на ВМРО-ДПМНЕ не испорача ‘историски резултати’ а наместо ‘горда Македонија’ коалициски партнери во Владата не го почитуваат ниту македонскиот јазик. Од ВМРО-ДПМНЕ и Мицкоски молк. Нема реакција, нема извинување, нема барање за одговорност. Прашањето е едноставно: за ова ли на Мицкоски му требаа 58 пратеници? За уште поголемо непочитување на македонскиот јазик и институциите?“,
изјави потпретседателот на СДММ, Јовица Јанковиќ, на денешната прес-конференција.
Од СДСМ потсетуваат дека ова не е изолиран случај и дека сличен имаше во јуни годинава кога директорот на Инспекторатот за употреба на јазиците, Арсим Идризи, одби да одговори на новинарски прашања на македонски јазик, инсистирајќи дека согласно Законот за употреба на јазиците треба да има преведувач. Премиерот Христијан Мицкоски тогаш најави дека ќе го разреши Идризи ако уште еднаш одбие да се обрати на македонски јазик.
„Ќе го разреши ли Мицкоски сега Фетаи? Или функционерите од власта се недопирливи? Уште колку пати Мицкоски ќе каже нешто, па ќе го порече? Законот за употреба на македонскиот јазик, донесен во 2024 година, предвидува и санкции за неупотреба на македонскиот јазик. Казни од 1 500 до 3 000 евра за непочитување на употребата на македонскиот јазик има, ама нема кој да ги напише“,
додава Јанковиќ.
Вицепремиерот за добро владеење Арбен Фетаи вчера беше на настан по повод промоција на новите црвено-жолти регистарски таблички кои треба да се аплицираат на службените возила до 15 септември или најдоцна до почетокот на кампањата за локалните избори која стартува на 29 септември. Му беа поставени неколку новинарски прашања – сите на македонски јазик, а тој инсистираше дека ќе одговори на албански.
„На албански сакам да одговорам ако може. Уште не сум спремен на македонски“,
изјави Фетаи.