Полициски тимови се распоредени пред црквите во Велес и контролираат каде се движат верниците, откако Владата во пресрет на Задушница забрани посета на гробиштата, но не и на црквите. На влезот на соборниот храм „Свети Пантелејмон” во Велес полицајците ги прашуваа верниците дали носат заштитна маска и каде точно се тргнати, оти црквата е опколена со гробишта. И вчера полицијата набљудуваше дали има групирање и дали верниците носат маски во црквите.
Освен во Скопје, Тетово, Куманово и Штип со околните села каде на сила е 80-часовен полициски час, во останатите делови на државава забраната за движење почнува секој ден од 16 часот и трае до 5 наутро. И двете забрани за движење важат само за тековниот продолжен викенд.
Верниците кои денеска ги посетија црквите во Велес пред да почне полицискиот час негодуваат што Владата викендов забранила посета на гробиштата. Велат дека поголем е метежот во маркетите и пазарите, отколку на гробовите.
Празникот Задушница со молитва и традиционалното раздавање храна секоја година досега се одбележуваше на православните гробишта за помен на починатите. Во некои делови од државата во петок навечер, а некаде во сабота наутро.
По владината забрана за посета на гробовите, Повардарската епархија ги повика сите верници празникот да го одбележат во црковните дворови.
По повикот на Повардарската епархија, Основното јавно обвинителство – Велес отвори предмет по допрен глас за, како што соопштија оттаму, „утврдување факти во предметот и евентуална кривична одговорност“.
„Дадени се насоки на СВР – Велес за обезбедување податоци во однос на стореното дело и испитување на околностите, односно дали содржи обележја на кривично дело, како и во поглед на почитувањето на мерките што ги определи Владата“,
соопшти Обвинителството.
„360 степени” подготвува репортажа од одбележувањето на Задушница за време на вонредната состојба во делови на Повардарската епархија. Прилогот ќе се емитува во емисијата „360 степени“ в понеделник од 22 часот на телевизија Алсат.