„Не треба да се заборави дека ова е истиот политичар кој им го забрани користењето на албанското знаме на претставниците на ВЛЕН, а денес се обидува да го релативизира Охридскиот мировен договор, нарекувајќи го исполнет и надминат“, пишува во партиската реакција за изјавата на Димитриевски за Бадентеровото мнозинство
Лидерот на владиниот партнер Движење ЗНАМ – За Наша Македонија и градоначалник на Куманово, Максим Димитриевски, со неговите изјави отвора нов фронт против Бадентеровото мнозинство, уставниот механизам што гарантира еднаквост и стабилност во државата. Ова е денешната реакција на Демократската унија за интеграција (ДУИ) на вчерашната изјава на Димитриевски дека во одредени моменти Бадентеровото правило ја доведува во прашање функционалноста на државата, но и дека тоа веќе со потврда ќе го имаме по завршувањето на локалните избори.
Според ДУИ, вчерашната изјавата на лидерот на ЗНАМ е продолжение на оркестрирана кампања на оваа влада и нејзините партнери за рушење на темелите на Охридскиот рамковен договор и враќање на државата назад, во неправда и исклучување.
„Не треба да се заборави дека ова е истиот политичар кој им го забрани користењето на албанското знаме на претставниците на ВЛЕН, а денес се обидува да го релативизира Охридскиот мировен договор, нарекувајќи го исполнет и надминат“,
се вели во партиската реакција од ДУИ.
Оттаму велат дека ова не е случајност, туку продолжение на програмата на ВМРО-ДПМНЕ, која пред изборите отворено најави мерки против мултиетничноста и Охридскиот мировен договор.
„Во иста линија беше и иницијативата на ВМРО-ДПМНЕ за целосно укинување на Законот за употреба на јазиците пред Уставниот суд. Нивните денешни партнери едноставно ја спроведуваат таа агенда“,
пишува во соопштението од партијата.
Според ДУИ, октомври е блиску и народот на народниот референдум ќе покаже дека Охридскиот мировен догвоор не смее да се допира, дека достоинството на Албанците не се преговара, како и дека секој обид за нивно исклучување и понижување ќе биде жестоко казнет.
Од првиот ден на мандатот, според партијата, Владата ги нападна столбовите на еднаквоста, односно го укина „балансерот“ и го поткопа правичното претставување на Албанците и другите заедници во државните институции, го девалвираше Охридскиот рамковен договор, доверувајќи му ја неговата имплементација на Иван Стоилковиќ, личност со добро познати антиалбански и путинистички убедувања, ја избриша дијаспората од пресметките, ги намали Албанците во официјалните пресметки, го девалвираше Инспекторатот за употреба на јазиците и ја претвори Агенцијата за примена на јазиците во нефункционална институција.
Димитриевски вчера од Струга, коментирајќи ја изјавата на министерот за правда Игор Филков, рече дека во одредени моменти Бадентеровото правило ја доведува во прашање функционалноста на државата.
Според него, одредени политички субјекти го злоупотребуваат Бадентеровото мнозинство.
Подвлече дека партијата го поддржува Рамковниот договор и оти е во целост исполнет, но одредени политички субјекти го злоупотребуваат Бадентеровото мнозинство.
Изјавата дека употребата на Бадентеровото мнозинство се злоупотребува и оти можеби е дојдено време да се размисли за потребата тоа да се ревидира, министерот Филков ја даде во интервју за „Фокус“, кое беше направено пред гласањето во Собранието, кога не без изгласани измените во Изборниот законик. Целта беше да се регулира и бројот на потписи што треба да ги соберат независните кандидати за да може да учествуваат на избори.
Потоа веднаш се огласи и потпретседателот на Демократската унија за интеграција (ДУИ), поранешен шеф на дипломатијата и актуелен кандидат за градоначалник на Општина Чаир, Бујар Османи, посочувајќи оти со ова се потврдува дека планот за демонтирање на Охридскиот договор се реализира чекор по чекор.