Според него, тоа веќе со потврда ќе го имаме по завршувањето на локалните избори
Во одредени моменти Бадентеровото правило ја доведува во прашање функционалноста на државата, рече денеска лидерот на Движењето ЗНАМ – За наша Македонија, Максим Димитриевски, од Струга, коментирајќи ја изјавата на министерот за правда Игор Филков дека употребата на Бадентеровото мнозинство се злоупотребува и ако е така, тогаш можеби е дојдено време да се размисли за потребата тоа да се ревидира бидејќи Македонија мора да оди напред.
Според него, изјавата на министерот Филков се однесува исклучиво на функционалноста на Бадентеровото правило.
„За нас како политички субјект, Рамковниот договор е завршена работа, апсолвирана, и тој во целост е исполнет и реализиран. Но, факт е дека во одредени моменти правилото на Бадентер ја доведува во прашање функционалноста на државата. Тоа веќе со потврда ќе го имаме по завршувањето на локалните избори“,
рече тој.
Посочи и дека одредени политички субјекти го злоупотребуваат Бадентеровото мнозинство.
Тој подвлече дека партијата го поддржува Рамковниот договор и оти е во целост исполнет, но одредени политички субјекти го злоупотребуваат Бадентеровото мнозинство.
Изјавата дека употребата на Бадентеровото мнозинство се злоупотребува и оти можеби е дојдено време да се размисли за потребата тоа да се ревидира, министерот Филков ја даде во интервју за „Фокус“, кое беше направено пред гласањето во Собранието, кога не без изгласани измените во Изборниот законик. Целта беше да се регулира и бројот на потписи што треба да ги соберат независните кандидати за да може да учествуваат на избори.
Потпретседателот на Демократската унија за интеграција (ДУИ), поранешен шеф на дипломатијата и актуелен кандидат за градоначалник на Општина Чаир, Бујар Османи, рече оти со ова се потврдува дека планот за демонтирање на Охридскиот договор се реализира чекор по чекор.
Говорејќи на истата тема, премиерот Христијан Мицкоски рече дека Бадентеровото мнозинство е дел од Охридскиот рамковен договор, а тој, пак, е дел од Уставот и оти Рамковниот договор е исполнет во целост, што е завршена тема, а она што претставувало суштински и институционален проблем, алатката „балансер“, која беше укината од страна на Уставниот суд, сега би требало да се реши со Закон за правична застапеност, во кој покрај етничката, ќе има и компонента која ќе оценува согласно квалитетите и компетенциите на кандидатите за вработување.