Во земјава за утре, особено во попладневните часови се очекува нестабилно време со локален пороен дожд и грмежи
Делови од Словенија денеска се поплавени поради ненадејни и обилни врнежи од дожд што не престануваат од утринските часови.
Југозападниот дел на Приморска Словенија, по границата со Хрватска, денеска е погоден од силно невреме. Поплавени се улици и куќи, а сообраќајот на одредени места е запрен.
Невремето оштети неколку патишта во областа на градот Копер, а имаше свлечиште пред тунелот Декани од правец на Чрни Кал кон автопатот.
Општина Копер им советуваше на жителите да ги отстранат своите возила од пониските области и паркинзите.
Обилните врнежи од дожд сè уште се задржуваат помеѓу словенечка Истра и внатрешноста на земјата.
„Метео Словенија“ соопшти дека на некои места веќе наврнале повеќе од 150 милиметри дожд.
Во областа на Загреб денеска попладне врнеше обилен дожд, проследен со грмотевици и со силни налети на северозападни ветрови.
Црвен метеоролошки аларм е издаден за три хрватски региони, како Книн, Риека и Сплит.
Остатокот од земјата е префрлен во портокалов метеоролошки аларм поради можноста за грмотевици и силни ветрови.
Во земјава за утре, особено во попладневните часови, се очекува нестабилно време со локален пороен дожд и грмежи. Ќе дува умерен до засилен ветер од јужен правец.
Во недела се очекува променливо облачно време, претпладне со локален дожд и ретки грмежи и со северозападен ветер, кој ќе услови опаѓање на дневната температура.