Кај бремената жена се констатирани бројни повреди на главата, но и на плацентата во која е сместен плодот
Хрватски државјанин е осомничен дека извршил семејно насилство и телесно ја повредил неговата бремена сопруга во домот во Скопје, информираат од Јавното обвинителство.
Во образложението за случајот, се вели дека тој прво почнал да и се обраќа на висок тон, а потоа физички ја нападнал, удирајќи ја со тупаници и шлаканици по главата и телото. Потоа, продолжил силно да ја притиска за вратот, иако знаел дека е во петтиот месец од бременоста.
„Во еден момент ја зграбил и насилно ја фрлил во креветот, по што и ја удирал главата од ивицата на креветот. Престанал кога оштетената почнала да крвари. Потоа, жртвата успеала да се засолни во тоалетот и да повика полиција и брза помош“,
пишува во соопштението од Обвинителството.
Откако слушнал дека повикува помош, осомничениот го напуштил станот.
Кај бремената жена се констатирани бројни повреди на главата, но и на плацентата во која е сместен плодот.
Основното јавно обвинителство (ОЈО) Скопје поведе постапка против државјанин на Република Хрватска, осомничен за кривично дело – телесна повреда.
Јавеен обвинител до судија на претходна постапка од Основниот кривичен суд Скопје достави предлог за определување мерка притвор за осомничениот.