Османи ги отфрли обвинувањата насочени кон него од политичките противници и ја опиша предизборната кампања како историски момент за Чаир. Тој нагласи дека во Чаир се буди енергија на отпор кон корупцијата и лошото менаџирање
Во Чаир се случува нешто поголемо отколку само обична предизборна кампања. Овие избори во Чаир се историски, вели кандидатот за градоначалник Бујар Османи.
Османи ги отфрли обвинувањата насочени кон него од политичките противници и ја опиша предизборната кампања како историски момент за Чаир. Тој нагласи дека во Чаир се буди енергија на отпор кон корупцијата и лошото менаџирање.
„Во Чаир се буди движење за достоинство, за отпор, за нов и чист Чаир, движење што ќе покаже дека Чаир не може да биде ничија приватна компанија и мојата улога во ова е само да бидам гласноговорник на таа енергија, институционално да ја канализирам таа енергија, а победата нема да биде моја, таа ќе биде на граѓаните на Чаир што ќе излезат масовно и ќе кажат доста е“,
рече Османи на денешната прес-конференција.
На новинарско прашање дали е вистина дека побарал помош од Унгарија за подобрување на односите со ВМРО-ДПМНЕ, Османи ги нарече како смешни спинови ваквите обвинувања.
„Овие партиски спинови станаа смешни, го покажав мојот став вчера, народот се крена, ова не е работата за која бараме помош, не бараме помош од ниедна политичка партија, јас барам гласови од секој граѓанин. Се потпирам зад луѓето, зад ова движење и мојата цел на овие избори е само институционално да ја насочам енергијата на отпорот, движењето на отпорот што е создадено во Чаир, да го предводам референдумот, референдумот што ќе се одржи во Чаир на 19 октомври“,
рече тој.
Османи ги отфрли и обвинувањата што изминатиот период беа упати кон него, а вчера ги повтори неговиот противкандидат Изет Меџити, а се однесуваат на наводни незаконски постапки при организирањето на Самитот на ОБСЕ, велејќи дека таа тема е затворена од институциите.
„Таа тема е затворена и институциите ја имаат затворено и сега нормално на партиските штабови им треба како тема бидејќи немаат што друго да кажуваат. Ако имам некој капитал како човек, тоа ми е интегритетот. 20 години сум хирург, мене не може да ми излезе еден човек да каже дека еден денар можел да ми даде. Исто е и како политичар во сите мои години како министер“,
рече Османи.
Тој ја обвини владата дека со своите напади кон него, всушност, се обидува да ја прикрие својата нефункционалност и неуспех да и обезбеди европска иднина на државата.
„Тие треба да излезат и да кажат како успеаја една држава што беше на портите на Европската Унија денеска да стане прокси-играч на српскиот и рускиот свет. Како тоа од албанска банка завршивме на српска банка. Како тоа Македонците се приморани да продолжат да земаат бугарски пасоши поради социјални причини, а не поради идентитетски причини. Затоа што државата не им обезбедува европска иднина. Тоа ние треба да го зборуваме“,
рече Османи додавајќи дека ваквите спинови само им нанесуваат штета на оние што ги шират.
Инаку, Османи вчера изјави дека од владејачката ВМРО-ДПМНЕ преку приватни канали добиваат пораки за затоплување на односите со Демократската унија за интеграција (ДУИ).
Османи ова го кажа прашан за коментар на изјавите на премиерот Христијан Мицкоски, кој рече дека опозицијата ќе загуби на локалните избори во сите општини и порача дека очекува од ДУИ да биде конструктивна опозиција во однос на Бадентеровото мнозинство, особено кога станува збор за измените на Изборниот законик.
Коментирајќи ја изјавата на премиерот, Османи рече дека во јавноста тој дава едни пораки, додека преку приватни канали од ВМРО-ДПМНЕ до ДУИ стигнуваат други за затоплување на односите меѓу двете партии, во насока на влез на ова партија во Владата.
Прашан дополнително дали тоа значи дека има комуникација меѓу ВМРО-ДПМНЕ и ДУИ, тој кажа дека има постојани контакти и пораки од ВМРО-ДПМНЕ до нив за затоплување на односите.
На дополнително прашање дали под затоплување на односите се мисли на идно коалицирање и влегување на ДУИ во Владата, Османи кратко одговори: „Да“.