Пратеникот на ВМРО-ДПМНЕ рече и оти сега за разлика од времето на владеењето на СДСМ инфлацијата е помала за триесет отсто
Во период од јули 2024 до јули 2025 година растот на реалната плата изнесува 6,7 отсто, што е двојно поголем од вкупниот раст во целосното владеење на СДСМ и ДУИ, кој од јули 2017 до јули 2024 година изнесувал само 3,5 отсто, рече денеска на прес-конференција пратеникот од редовите на ВМРО-ДПМНЕ, Бојан Стојаноски.
Тој вели дека реалната плата е вистинската куповна моќ што ја има платата и не е номинален износ, туку вредносен. Дополнително, вели растот на реалната плата за времето откако ВМРО-ДПМНЕ е на власт покажува неколку работи и тоа дека инфлацијата е намалена, растот на економијата е забрзан, дека е зголемена потрошувачката и оти производството расте.
„Во период од јули 2024 до јули 2025 година просечната стапка на инфлација е 3.6 отсто, додека во период од јули 2017 до јули 2024 година просечната стапка на инфлацијата е 4,8 отсто“,
рече Стојаноски.
Тој рече и оти во времето на СДСМ единствено добро им одело само на неколку бизнисмени кои се блиски до власта, а кои биле главни „тендераши“, додека пак сега економијата оди напред, има развој и раст кој е сеопфатен и кој го чувствува секој граѓанин во земјата.