„Во унитарна парламентарна демократија владее волјата на граѓаните, а таа јасно кажува – со криминалци влада нема да има!“, се вели во реакцијата на ВМРО-ДПМНЕ на изјавата на потпретседателот на ДУИ и кандидат за градоначалник на Чаир, Бујар Османи, во која рече дека премиерот Христијан Мицкоски едно зборува во јавност, но преку приватни канали испраќа пораки за затоплување на односите со интегративците и идно коалицирање
На Бујар Османи или не му кажале или не сака да се сети на времето кога преговарачкиот тим на ДУИ остави бел лист хартија пред ВМРО-ДПМНЕ подготвени да го исполнат секое барање само за да останат во Владата која беше поразена на избори.
Ова се вели во првата реченица од реакцијата на владејачката ВМРО-ДПМНЕ на денешната изјава на потпретседателот на ДУИ и кандидат за градоначалник на Чаир, Бујар Османи, во која рече дека премиерот Христијан Мицкоски едно зборува во јавност, но преку приватни канали испраќа пораки за затоплување на односите со Интегративците и идно коалицирање.
„Тогаш така храбро не звучеа и не се однесуваа првенците на ДУИ кои сега силно се удираат во гради. А Бујар Османи може да глуми принципиелност, но вистината е очигледна: врвот на ДУИ е претворен во милионерска елита, додека народот живее во сиромаштија. Затоа денес ДУИ ветува функции и влез во владата на своите разочарани членови, надевајќи се дека ќе ја сокријат сопствената корупција и криминални зделки“,
се вели во соопштението од ВМРО-ДПМНЕ.
Во реакцијата, од ВМРО-ДПМНЕ одговараат и на ставовите на Османи во врска со третманот на Албанците од страна на оваа владејачка гарнитура, како и за принципите за коалицирање во Владата.
Во тој контекст од владејачката партија велат дека „и Македонците избираа партија со мнозинство, но ДУИ тоа никогаш не го почитуваше“, и наместо почит кон народната волја, тие секогаш бараа спас кај СДС“, партија со која, според ВМРО-ДПМНЕ, се нашле во заедничкиот именител – криминалот и корупцијата.
„Кога Бујар Османи зборува за ‘аморфна маса’, токму тука е суштината на проблемот. ДУИ цели 20 години ја третираше албанската заедница како аморфна маса – како гласачка машинерија за нивните бизниси и криминални зделки. Денес зборуваат за ‘правила’ и ‘победник со победник’, но тоа не е демократија, туку племенска математика измислена за да останат во фотелји. Во унитарна парламентарна демократија владее волјата на граѓаните, а таа јасно кажува – со криминалци влада нема да има!“,
велат од ВМРО-ДПМНЕ.
Оттаму, во таа насока, порачуваат дека ДУИ прво мора да се исчисти од криминалците, да се соочи со одговорност и да се реформира, па дури потоа да размислува за политичка иднина.
Според владејачката партија, единствено СДСМ со ова раководство, сè уште мисли на коалиција со ДУИ.
„Коалицијата на СДС и ДУИ ќе биде поразена на овие избори од коалицијата што ја предводи владата, затоа што граѓаните веќе ја препознаа разликата меѓу криминалната дружба која две децении ја пустошеше државата и новата власт која работи чесно, транспарентно и во интерес на народот. ВМРО-ДПМНЕ и владината коалиција ќе ја добијат довербата бидејќи ја враќаат надежта, ја градат државата на темели на одговорност и резултати, и покажуваат дека Македонија може да оди напред без СДС и ДУИ“,
велат од ВМРО-ДПМНЕ.
Потпретседателот на ДУИ и кандидат за градочалник на Чаир, Бујар Османи, денеска прашан за коментар на изјавите на премиерот Христијан Мицкоски дека опозицијата ќе загуби на локалните избори во сите општини и оти очекува од ДУИ да биде конструктивна опозиција во однос на Бадентеровото мнозинство, особено кога станува збор за измените на Изборниот законик, рече дека премиерот дава едни пораки во јавност, додека преку приватни канали од ВМРО-ДПМНЕ до ДУИ стигнуваат други за затоплување на односите меѓу двете партии, во насока на влез на ова партија во Владата.
„Меѓутоа нашиот став ние го кажавме, ДУИ нема да прави пазар за влегување во Влада, излези еден, влези друг“,
рече Османи.
На дополнително прашање дали под затоплување на односите се мисли на идно коалицирање и влегување на ДУИ во Владата, Османи кратко одговори: „Да“.