„Премиерот во јавноста дава пораки сметајќи дека така ќе им помогне на коалициските партнери, но не пушта такви пораки преку приватните канали. Други пораки се праќаат до ДУИ за да се затоплат односите. Меѓутоа нашиот став ние го кажавме, ДУИ нема да прави пазар за влегување во Влада, излези еден, влези друг“, рече денеска Османи, прашан за коментар на изјавите на премиерот Христијан Мицкоски
Одговарајќи на дополнително прашање дали под затоплување на односите се мисли на идно коалицирање и влегување на ДУИ во Владата, Османи кратко одговори: „Да“
Потрпретседателот на Демократската унија за интеграција (ДУИ) и кандидат за градоначалник на Општина Чаир, Бијар Османи денеска изјави дека од владејачката ВМРО-ДПМНЕ преку приватни канали добиваат пораки за затоплување на односите.
Османи ова го кажа прашан за коментар на изјавите на премиерот Христијан Мицкоски, кој денеска од Битола рече дека опозицијата ќе загуби на локалните избори во сите општини и порача дека очекува од ДУИ да биде конструктивна опозиција во однос на Бадентеровото мнозинство, особено кога станува збор за измените на Изборниот законик.
Коментирајќи ја изјавата на премиерот, Османи рече дека во јавноста тој дава едни пораки, додека преку приватни канали од ВМРО-ДПМНЕ до ДУИ стигнуваат други за затоплување на односите меѓу двете партии, во насока на влез на ова партија во Владата.
„Премиерот во јавноста дава такви пораки сметајќи дека така ќе им помогне на коалициските партнери, но не пушта такви пораки преку приватните канали. Други пораки се праќаат до ДУИ за да се затоплат односите. Меѓутоа нашиот став ние го кажавме, ДУИ нема да прави пазар за влегување во Влада, излези еден, влези друг“,
рече Османи.
Албанците, како што додаде тој, нема да дозволат некој да ги потчини, и да ги третира како „аморфна маса“ каде премиерот решава кој ќе ги преставува во Владата.
„Не! Албанците ќе гласаат на избори и ќе одлучат самите кој ќе ги претставува. Албанците нема да дозволат некој да им ја крои политичката сцена од седиштето на ВМРО-ДПМНЕ, бидејќи така се губи смислата зошто ние излегуваме на избори, се губи смислата зошто јас денеска барам поддршка на секоја врата. Зошто, која е логиката? Треба да седнам до седиштето на ВМРО-ДПМНЕ, да станам пријател со Мицкоски и тој да ме постави за министер, како што ги поставил за министри своите поранешни заменици и директори, со кои направил некакво пријателство и нив ги претставува како претставници на Албанците“,
рече кандидатот на ДУИ за градоначалник на Чаир.
Говорејќи во тој контекст, Османи направи паралела со случувањата во 1990-тите години на минатиот кога од Белград се одлучувало кој ќе ги преставува Албанците на Косово.
„(Слободан) Милошевиќ од Белград носеше претседател на Косово, Рахман Морина и велеше овој е претседателот на Косово. Албанците во Косово формираа паралелни институции, испраќајќи порака дека нема да прифатат некој да им кажува кој ќе ги преставува. И затоа мислам дека тоа е погрешен пристап и мислам дека и Мицкоски тоа го има сфатено и затоа ВМРО-ДПМНЕ секој ден ни испраќаат пораки како да го затоплиме односите бидејќи анкетите покажуваат три спрема еден на Националната алијансата за интеграција (како што се преименуваше ‘Европскиот фронт“ за претстојните локални избори) наспроти ВЛЕН“,
рече Османи.
Прашан дополнително, дали тоа значи дека има комуникација меѓу ДМРО-ДПМНЕ и ДУИ, тој кажа дека има постојаи контакти и пораки од ВМРО-ДППМНЕ до нив за затоплување на односите.
„Иако во јавноста постојано се кажува спротивното за изборна математика, јас морам да бидат искрен затоа што не можам веќе да ги слушам овие различни ставови, едни приватно, други јавно“,
рече потпретседателот на ДУИ и кандидата за градоначалник на Чаир.
На дополнително прашање дали под затоплување на односите се мисли на идно коалицирање и влегување на ДУИ во Владата, Османи кратко одговори: „Да“.