По повеќе од девет месеци од почетокот на протестите, српскиот претседател рече оти е спремен да ги слушне предлозите на студентите
Претседателот на Србија, Александар Вучиќ, преку видеообјава на социјалните мрежи ги покани претставниците на „студентско-блокадерското движење“ на јавна дебата, што, како што рече, би се емитувала на сите национални телевизии. Според него, Србија мора да ги решава проблемите низ дијалог, а не на улица.
„Ги повикувам претставниците на студентско-блокадерското движење да разговараме за визиите, за иднината на Србија. Сакам сите заедно да го осудиме насилството на улиците. Сметам дека е важно да се слушнат нивните барања, иако не се согласувам со нив. Јас верувам дека само преку дијалог можеме да дојдеме до решение“,
рече Вучиќ.
Тој потсети дека протестите низ земјата траат веќе девет месеци и додаде дека е подготвен да ги слушне студентите и нивните предлози бидејќи, како што нагласи, секогаш ќе биде „на страната на демократијата“.
Реакцијата на студентите пристигна речиси веднаш. Тие порачаа дека нема да седнат на маса со Вучиќ во овој момент, туку ќе дебатираат единствено во изборна кампања.
„Ќе разговараме со Александар Вучиќ тогаш кога ќе бидат распишани избори. Нашата цел е да дебатираме за иднината на Србија во предизборната кампања, а не сега, кога со месеци нè нарекува терористи и непријатели на државата. Сè додека нема избори, не гледаме причина за таков разговор“,
му одговорија студентите од Филозофскиот факултет во Белград.