„Ќе бидат преземени конкретни законски мерки против вклучените лица, вклучително и кривични постапки“, велат од СВР Куманово
Неколку лица во текот на вчерашниот ден се повикани на службен разговор во врска со инцидентот на натпреварот Македонија-Романија одржан во саботата, на кој беа регистрирани скандирања со навредлива содржина, информираат денеска од Секторот за внатрешни работи (СВР) Куманово.
„По извршени анализи во координација со Јавниот обвинител, ќе бидат преземени конкретни законски мерки против вклучените лица, вклучително и кривични постапки“,
се наведува во соопштението на СВР Куманово.
Додаваат дека кумановската полиција презема мерки за целосно расчистување на случајот.
Претходно вчера ОЈО Куманово информира дека постапува во врска со националистичките скандирања на кошаркарскиот натпревар меѓу Македонија и Романија. Оттаму соопштија дека издале повеќе наредби до СВР Куманово, меѓу кои и наредба за обезбедување на снимки од видео надзор за да ги идентификуваат сторителите.