Хеликоптерот „Блек Хок“, како што информира првиот човек на ДЗС, утре наутро ќе полета од Чешка и во текот на денот ќе биде на скопскиот аеродром од каде што ќе биде упатен онаму каде што е најпотребен. Пожарникарите од Словенија, пак, 50-ина на број, утревечер или доцна во текот на ноќта ќе пристигнат во Берово
Директорот на Дирекцијата за заштита и спасување (ДЗС), Стојанче Ангелов, информира дека Чешка и Словенија денеска понудиле помош за справување со пожарите во земјава.
Помошта, како што соопшти Ангелов во попладневното видеојавување, вклучува еден хеликоптер марка „Блек Хок“ од Чешка и 50 пожарникари и специјални возила за гасење шумски пожари од Словенија.
„Хеликоптерот утре наутро ќе полета и во текот на утрешниот ден ќе биде на скопскиот аеродром, а веднаш потоа ќе биде упатен онаму каде што ќе биде најпотребен. Словенците ќе тргнат утре околу пладне, а утревечер доцна во ноќта ќе бидат пристигнати во Берово и ќе бидат поддршка на беровските пожарникари и другите служби кои учествуваат во гасењето на големиот пожар на планината Готен од беровска страна“,
изјави Ангелов.
Првиот човек на ДЗС најави и дека вечерва во 21 часот во Берово ќе заседава Кризниот штаб.
Ангелов изрази надеж дека најавената прогноза на УХМР за врнежи од дожд во североисточните и источните делови на земјава во текот на ноќта ќе се оствари и ќе придонесе за подобрување на состојбата на местата каде што со денови беснеат шумски пожари.