Како што може да се види од фотографиите на ДЗС, планинарот со скршеница на ногата бил заглавен помеѓу карпест засек под врвот на Пелистер
Успешно заврши акцијата на Дирекцијата за заштита за спасување (ДЗС) и на Министерството за внатрешни работи (МВР) за извлекување на планинар со скршеница на ногата од непристапен терен на планината Пелистер.
За епилогот на акцијата попладнево преку објава на својот фејсбук-профил информираше министерот за внатрешни работи Панче Тошковски, кој напиша дека во неа од страна МВР учестувале тројца припадници на Одделот за воздухопловни единици и четворица припадици на специјалната антитерористичка единица „Тигар“.
„Упатувам искрена благодарност за нивната пожртвуваност, професионализам и човечност“,
се вели во објавата на Тошковски, во која сподели и видео од спасувачката акција.
Речиси истовремено, видое и фотографии од акцијата сподели и директорот на Дирекцијата за заштита и спасување Стојанче Ангелов, кој првично информираше за повредениот планинар на Пелистер и мерките што се преземаат за негово безбедно извлекување од непристапниот терен.
Како што може да се види од фотографиите на ДЗС, планинарот со скршеница на ногата бил заглавен помеѓу карпест засек под врвот на Пелистер.
Инаку, како што информираше Анлегов денеска претпладне до местото оддалечено беше упатена екипа од тимот за спасување на планина на Дирекцијата за заштита и спасување со задача да го имоблизираат повредениот планинар, да го подготват и да го пренесат на отворено место, бидејќи локацијата каде се наоѓал била оддалечена неколку часа одење пеш од последната позиција до која може да се стигне со возило.
По преземањето на сите мерки, од фотографиите и видеата што ги споделија од двете институции се гледа како планинарот на носилки го пренесуваат до хеликоптерот на МВР за транспорт до здравствена установа за натамошна лекарска помош.