Меѓу активните пожари е и огнената стихија што вчера избувна во општина Желино кон селото Еребино, каде горат нискостебелста шума, грмушки и ниска вегетација
Во изминатото деноноќие, а заклучно со 8 часот утрово, на територијата на државата се регистрирани вкупно 29 пожари на отворен простор, од кои пет сè уште се активни, два се под контрола, а 22 се изгаснати, информира Центарот за управување со кризи (ЦУК).
Меѓу активните пожари е и огнената стихија што вчера избувна во општина Желино кон селото Еребино, каде што горат нискостебелста шума, грмушки и ниска вегетација. Оваа стихија, во еден дел од денот, предизвика и затворање на регионалниот пат од Скопје кон Тетово, а возилата беа пренасочувани по автопатот Скопје – Тетово. Градоначалникот на Желино, Блерим Сејдиу, излезе со сомнеж деа пожарот е подметнат, но засега нема информации од надлежните во врска со ваквите наводи.
Според ЦУК, и понатаму е активен пожарот во општина Василево, кај селото Нивичино, каде неколку дена горат нискостеблеста шума, смрека, грмушки и ниска вегетација.
На територијата на општина Македонски Брод активен е пожарот кај селото Грешница, а, како што информираат од ЦУК, реактивирана е стихијата на потегот меѓу селата Црешево, Локвица и Крапа во истата општина.
Петтиот пожар кој надлежните сè уште не успеваат да го стават под контрола е оној во општина Прилеп, помеѓу селата Царевиќ и Смолани, каде се зафатени мешана шума и ниска вегетација.
Според информацијата на ЦУК, под контрола се пожарите во Македонски Брод, кај селото Слатина, каде гореа смрека, сува трева и друга ниска вегетација, и во Велес на потегот меѓу селата Џидимирци – Крушје – Иванковци, со зафатена нискостеблеста деградирана шума.