Со тешки телесни повреди се здобил неговиот сопатник, исто така 16-годишник од Охрид, кој е префрлен на лекување во Специјалната болница за ортопедија и трауматологија „Свети Еразмо“
Малолетник рано утрово настрада во сообраќајна незгода што се случи на регионалниот пат Охрид – Свети Наум, во близина на населбата Рача, кога возејќи мопед излетал од патот и удрил во метален столб, информираат денеска од Секторот за внатрешни работи (СВР) Охрид, чии полициски службеници извршија увид на местото на несреќата.
„Незгодата се случила рано утрово во 1:40 часот, кога на потегот меѓу населбата Рача и стариот влез на хотелот ‘Парк‘, 16-годишик од Охрид, возејќи мопед излетал од коловозот и удрил во метален столб“,
се вели во полицискиот извештај.
Малолетникот се здобил со тешки телесни повреди и со возило на Итната медицинска помош е пренесен во Општата болница во Охрид, каде им подлегнал на повредите.
Со тешки телесни повреди се здобил и неговиот сопатник, исто така 16-годишник од Охрид, кој е префрлен на лекување во Специјализираната болница за ортопедија и трауматологија „Свети Еразмо“ во Охрид.