Од Министерството за внатрешни работи (МВР) соопштија дека двата нивни хеликоптери – „бел 412“ и „агуста бел 212“, кои интервенираат кај Блаце, утрово од 5 до 9 часот исфрлиле повеќе од 30 тони вода и сè уште активно оперираат на теренот
Пожарот што вчера попладне избувна над магистралниот пат Скопје-Блаце делумно е ставен под контрола, соопшти утрово директорот на Дирекцијата за заштита и спасување (ДЗС), Стојанче Ангелов.
Според него, многубројни противпожарни екипи на скопската Противпожарна бригада со поддршка на полициски и армиски хеликоптери се борат да се справат со два крака од огнената стихија што сè уште се активни.
„Рано утрово скопската противпожарна бригада со повеќе возила и екипи започна со гаснење, а како помош се придружија и два полициски хеликоптери, еден армиски хеликоптер, еден ‘пинцгауер’ на Дирекцијата за заштита и спасување (ДЗС) и еден ‘хермелин’ со поголема цистерна на ДЗС. Пожарот е ставен под делумна контрола, за жал сè уште имаме активни два краци“,
вели Ангелов во видеоизјавата.
Едниот крак од пожарот, како што информира директорот на ДЗС, утрово бил ставен под контрола по прецизно дејство на полициските хеликоптери вклучени во гаснењето на огнената стихија.
Од Министерството за внатрешни работи (МВР) соопштија дека двата нивни хеликоптери – „бел 412“ и „агуста бел 212“, кои интервенираат кај Блаце, утрово од 5 до 9 часот исфрлиле повеќе од 30 тони вода и сè уште активно оперираат на теренот.
Инаку, претходно утрово директорот на Дирекцијата за заштита и спасување соопшти дека можна причина за избувнувањето на пожарот над магистралниот пат Скопје-Блаце во скопско Чучер-Сандево е фрлено догорче од цигара од возило во движење или намерно потпалување.
Тој упати апел до граѓаните доколку забележат пожар веднаш да пријават на бројот 112.
Министерството за внатрешни работи доцна синоќа информира дека е нормализиран сообраќајот до граничниот премин „Блаце“ и дека е укината забраната за движење за товарните возила и автобусите која беше воведена вчеравечер откако пожарот над магистралниот пат Скопје-Блаце се прошири.
Целосно ставен под контрола е пожарот што избувна во скопската населба Геге, а се прошири кон Бардовци, зафаќајќи дел од дворот на Психијатриската болница „Скопје“, соопштија од Министерството за здравство.
Оттаму информираат дека пожарот зафатил надворешен дел од дворот на болницата обраснат со сува трева и е успешно локализиран. Не е причинета друга материјална штета врз болничките објекти и нема повредени.
Од безбедносни причини вчера вечер во краток временски период била спроведена превентивна евакуација на дел од пациентите и вработените во болницата, а навремената и координирана интервенција на надлежните служби спречила проширување на пожарот на болничките објекти, велат од Министерството за здравство.
Дека овој пожар е ставен под контрола синоќа соопштија и од Центарот за управување со кризи (ЦУК).
Инаку, како што формираат од ЦУК утрово, на територијата на државата во моментов се активни четири пожари од вкупно 12, колку што имало во изминатото деноноќие.
Покрај пожарот во скопско Чучер-Сандево, мешана шума гори во прилепското село Бешишта, кај селото Црешнево во Општина Македонски Брод со оган е зафатена деградирна дабова шума и грмушки, а пожар има и на територијата на општина Чашка, под Солунска Глава.